Darhan Qydyráli «ultqurý» termıni týraly: Men «qazaq» degenge toqtaımyn
«Ol – qalyptasqan ǵylymı termın. Ultqurý degen múmkin qazaqshada durys estilmegen shyǵar. Qazaqshaǵa aýdarylǵanda kalka bolǵan shyǵar. Biraq bul - ǵylymı termın. Jalpy etnos degen uǵym bar, ult degen uǵym bar. Men keshegi sessııanyń ekinshi otyrysyna qatysqan joqpyn. Biraq oǵan baılanysty jaqsy pikirler de aıtyldy. Árıne, el bolǵannan keıin syn da aıtylady. Biz jaqyn arada «Kózqaras» klýbynda osy máseleni keńirek talqylaımyz, sarapshylardy shaqyramyz. Jalpy ultqurýdyń álemde qalyptasqan uǵymdaryn talqylaımyz. Negizi ondaı máseleler ǵylymı turǵyda talqylanýy kerek. Ultqurýdyń túrli komponentteri bar. Sondyqtan biz bul máselege ǵylymı negizde qaraýymyz kerek. Bul taqyryp kimniń ıdeıasy ekenin aıta almaımyn. Taǵy da aıta alam, ekinshi sessııaǵa qatysqan joqpyn. Biraq ony aqparat quraldary arqyly bildim. Orysshasy «natsstroı» degen termın. Aǵylshyn tilinde bul týraly kóptegen kitaptar, zertteýler bar», - dedi vedomstvo basshysy.
BAQ ókilderi mınıstrden Qazaqstan azamattarynyń tólqujatyna ulty qalaı dep kórsetilgeni durys dep esepteıtinin surady.
«Men jalpy «qazaq» degenge toqtaımyn. Óıtkeni bizdiń bárimizdi qazaq dep qabyldaıdy. Vınokýrovty da, Golovkındi de, Rybakınany da shetelde qazaq sportshysy dep qabyldaıdy. Munyń bárine ǵylymı turǵyda kelýimiz kerek. Tólqujatta búkil ulttar qazaq bolýy kerek dep eshkim aıtyp jatqan joq. Qazir Prezıdent qandaı máseleler qozǵaıtynyn tyńdaıyq. Qazaqsha durys aýdarylmasa, ony ǵalymdardan suraý kerek. Jalpy bul kez kelgen órkenıetti elde keńinen talqylanatyn uǵym», - dedi Darhan Qydyráli.
Aıta keteıik, Prezıdent Qasym-Jomart Toqaevtyń qatysýymen Qazaqstan halqy Assambleıasynyń HHHІІ sessııasy ótip jatyr.