Darhan Káletaev jastardyń ÚEU-laryn damytý tetikterin usyndy
«Elimizdegi jastar saıasatyna Din isteri jáne azamattyq qoǵam mınıstrligi jaýapty ekenin bilesizder. Qazirgi ýaqytta damytýymyz kerek birshama basymdyqtardy kórip otyrmyz. Meniń oıymsha, biz memlekettik jastar saıasatynyń baǵytyn eki bólip naqty aıqyndap alýymyz kerek. Birinshiden, áleýmettik saıasat. Bul rette naqty boljamdar men aspektiler bar. Eń birinshiden, bilim alý, eńbekpen qamtý, otbasy qurý jáne turǵyn úımen qamtamasyz etý. Qarapaıym da túsinikti dúnıeler. Memleket atqara alatyn jumystar. Osy úshin birqatar memlekettik baǵdarlamalar bar», - dedi mınıstr.
Darhan Káletaev Úkimet te osy baǵytta jumys júrgizip jatqanyn, Prezıdenttiń bes áleýmettik bastamasy jáne onyń negizinde turǵyn úı salasyndaǵy máseleler «7-20-25» baǵdarlamasynda qamtylǵanyn atap ótti.
«Jastar saıasatyndaǵy ekinshi baǵyt - úkimettik emes jastar uıymy. Qazirgi tańda bizdiń Jastar saıasat departamentindegi málimet boıynsha Qazaqstanda 500-ge jýyq jastar ÚEU-sy bar. 800-den astam jastar isi jónindegi komıtet jumys istep tur. Jalpy, menińshe bul úlken kúsh. Jaǵdaı qýantarlyq baǵytta. Barlyq oblystarda jastar isi jóninde oblystyq basqarmalar, 200-den astam jastar resýrstyq ortalyqtary bar. Bul - biz qoldanýǵa tıis úlken uıymdastyrylǵan qurylym», - dedi ol.
Sondaı-aq mınıstr jastar saıasatyna qarqyn berýdiń tetikterin usyndy.
«Jastar ÚEU týraly aıtar bolsam, álbette olardy damytý qajettiligi bar. Meniń túsinýimshe, olardy qurý qajettigi týyndap otyrǵan joq. Bul rette «shatyrly» qurylymdardy, atap aıtqanda Qazaqstan jastar kongresin, Stýdentter alıansyn jáne QHA Jastar uıymyn qurý óziniń paıdasyn tıgize alady. Mine, osyndaı kúshter arqyly jastar ÚEU-laryn kúsheıte alamyz», - dedi ol.