Darhan Káletaev jastardyń búgingi máselesin kóterdi

  ASTANA. QazAqparat - Astanada «Bolashaq mamandyqtary: Y, Z urpaqtary qandaı baǵytqa daıyn bolýy kerek?» taqyrybynda respýblıkalyq ǵylymı-praktıkalyq konferentsııa ótti. Sharaǵa QR Din isteri jáne azamattyq qoǵam mınıstri Darhan Káletaev qatysyp, Prezıdenttiń Bes áleýmettik bastamasynyń jastar saıasaty máselelerin sheshýdegi mańyzyn atady. Bul týraly QazAqparat mınıstrliktiń baspasóz qyzmetine silteme jasap habarlaıdy.

Shara «Jastar» ǵylymı-zertteý ortalyǵynyń 5 jyldyǵyna oraı uıymdastyrylyp otyr. Ol 2013 jyly Elbasynyń Qazaqstan halqy Assambleıasynyń XIX sessııasynda bergen tapsyrmasyna sáıkes qurylǵan.

Konferentsııanyń maqsaty - jastardyń ózekti máselelerin talqylaý, eńbek naryǵy júıesiniń aǵymdaǵy jaǵdaıyn baǵalaý, jastardy jumyspen qamtýdyń jańa nysandary men jastardyń rýhanı-adamgershilik ıdealdaryn boljap taldaý, sonymen qatar «Rýhanı jańǵyrý» baǵdarlamalyq maqalasy men Prezıdenttiń Bes áleýmettik bastamasyn iske asyrý perspektıvalaryn talqylaý bolyp tabylady.

Ǵylymı-praktıkalyq konferentsııa jumysyna otandyq jáne sheteldik sarapshylar, memlekettik organdar men dıplomatııalyq qyzmet ókilderi qatysty.

Sharanyń ashylý rásiminde Darhan Káletaev QR Memlekettik hatshysy Gúlshara Ábdiqalyqovanyń «Jastar» ǵylymı-zertteý ortalyǵynyń 5 jyldyǵymen quttyqtaý hatyn oqyp berdi.

D. Kaletaev óz sózinde Qazaqstan Respýblıkasy Prezıdenti N.Á.Nazarbaevtyń Bes áleýmettik bastamasynda aıtylǵan memlekettik qoldaý sharalary negizinen jastardyń áleýmettik mártebesin kóterýge jáne jastardy alańdatatyn máselelerdi sheshýge baǵyttylǵanyn atap ótti. 

Mınıstrdiń aıtýynsha, jastar úshin bilim alý, jumyspen qamtý jáne otbasyn qurý búgingi kún tártibindegi eń ózekti máseleler bolyp tabylady.

Sondaı-aq, konferentsııa barysynda QR Bilim jáne ǵylym mınıstrliginiń jaýapty hatshysy Aryn Orsarıev, Almaty menedjment ýnıversıtetiniń prezıdenti Asylbek Qojahmetov, jastar saıasaty salasyndaǵy sarapshy Maria Cristina Basalso baıandama jasady.

«Jańa mamandyqtar atlasy» jobasyn qurastyrýshy Dmıtrıı Sýdakov «Bolashaqtyń daǵdylary. Jańa álemde neni meńgerýimiz qajet?» atty baıandamasyn tanystyrdy. Onda XXI ǵasyrdyń bazalyq daǵdylary men jumyspen qamtýǵa yqpal etetin protsesster týraly aıtyp ótti.

Konferentsııa aıasynda «Jańa jumyspen qamtý nysandary jáne ozyq bilim berý», «Fýtýrologııa jáne bolashaq mamandar», «Zamanaýı álemde bilim berý: Y, Z urpaqtarynyń rýhanı-adamgershilik ıdealdary» atty sektsııa jumystary ótkizildi. 

Konferentsııa qorytyndysy boıynsha materıaldar jınaǵy shyǵarý jáne rezolıýtsııa qabyldaý josparlanyp otyr.