Darhan Káletaev Taldyqorǵandaǵy «ASAR» forýmyna qatysty

TALDYQORǴAN. QazAqparat - Taldyqorǵanda kesheden beri «ASAR» respýblıkalyq úshjaqty yntymaqtastyq forýmy ótip jatyr. Elimizde osymen ekinshi ret uıymdastyrylyp jatqan sharaǵa QR Din isteri jáne azamattyq qoǵam mınıstri Darhan Káletaev qatysyp, forýmnyń plenarlyq sessııasyn ashty, dep habarlaıdy QazAqparat tilshisi.

Mınıstr óziniń alǵy sózinde «ASAR» forýmynyń alańy  qoǵamdaǵy ózekti máselelerdi sheshý úshin ÚEU, memleket jáne bıznestiń yntymaqtastyǵyna tıimdi, suranysqa ıe jáne kreatıvti dıalog alańyna aınalatynyna senim bildirdi.

«Taldyqorǵan qalasynda QR Din isteri jáne azamattyq qoǵam mınıstrliginiń bastamasymen Almaty oblysynyń ákimdigimen birlesip, «ASAR» forýmy uıymdastyrylýda. Bıznes, úkimettik emes uıymdar  jáne memleket arasynda úshjaqty kelisimsharttarǵa qol qoıyldy. Búgin ekinshi kún. Plenarlyq sessııasy bolyp jatyr. Keshe bes aýdıtorııada semınar trenıgter ótti. Bizdiń  bul sharadaǵy basty maqsatymyz - ÚEU men bıznes ókilderiniń bastaryn qosyp, olarǵa qarjylandyrý kózin, jalpy kózqarastaryn ózgertý. Máselen, buǵan deıin ÚEU-dy respýblıkada da, oblystarda da iri korporatsııa qoldasa, endi orta jáne shaǵyn bıznes te bul sharalarǵa aralasa bastady. Qazir osy shara aıasynda 8 memorandýmǵa qol qoıyldy. Orta jáne shaǵyn bıznes ókilderi tarapynan 39 mln teńgeniń jobasy qoldaý taýyp,  jýyq arada júzege asatyn bolady. Forýmǵa elimizdiń ár aımaǵynan ÚEU ókilderi, respýblıkalyq, halyqaralyq sarapshylar, jalpy alǵanda 300-ge jýyq adam qatysýda», - dedi Almaty oblystyq ishki saıasat basqarmasynyń basshysy Rýstam Alı.

«ASAR» respýblıkalyq úshjaqty yntymaqtastyq forýmy ótken jyly alǵash ret Atyraý oblysynda uıymdastyrylǵan bolatyn. «Rýhanı jańǵyrý»  baǵdarlamasy aıasynda júzege asyp jatqan forým «jyl saıyn jańa óńir» qaǵıdaty boıynsha ótkiziledi. Sarapshylardyń pikirinshe, búginde bılik pen úkimettik emes uıymdar arasyndaǵy jumys birshama rettelgen. Endigi mindet - osy maqsatqa bıznes qaýymdastyqty tartý.