Darhan Káletaev: Qazaqstanda jumyssyz jastar azaıdy

ASTANA. QazAqparat - QR Memlekettik hatshysy Gúlshara Ábdiqalyqovanyń tóraǵalyǵymen QR Prezıdenti janyndaǵy Jastar saıasaty jónindegi keńestiń kezekti otyrysynda QR Qoǵamdyq damý mınıstri Darhan Qaletaev Qazaqstandaǵy jumyssyz jastardyń sany azaıǵanyn atap ótti, dep habarlaıdy QazAqparat.

«Jastardy jumyspen qamtý máseleleri boıynsha jahandyq úrdistermen salystyrǵanda, eldegi jaǵdaı turaqty. 2001 jylmen salystyrǵanda jastar arasynda jumyssyzdyq deńgeıi 16% -dan 4% -ǵa deıin tómendedi jáne birneshe jyl qatarynan osy deńgeı saqtalyp keledi. Resmı statıstıka boıynsha, jumyssyzdyq deńgeıi 3,9% qurap otyr», - dep málimdedi D.Káletaev.

Elimizde jastardy áleýmettendirýge jáne jumyspen qamtamasyz etýge baǵyttalǵan birqatar jobalar júzege asyrylýda. Mysaly, «Jastar praktıkasy», «Dıplommen aýylǵa», «Máńgilik el jastary - ındýstrııaǵa» - «Serpin», «Jasyl el», «Jastar kadrlyq rezervi» jáne t.b. jobalar bar.

Mınıstrdiń aıtýynsha, Nátıjeli jumyspen qamtýdy jáne jappaı kásipkerlikti damytýdyń  2017-2021 jyldarǵa arnalǵan baǵdarlamasy aıasynda barlyq mamandarǵa arnalǵan tegin tehnıkalyq jáne kásibı bilim berý (TjKB) jobasy iske asyrylyp jatyr, bul ekonomıka qajettilikteri boıynsha bilikti mamandar daıarlaýǵa múmkindik beredi. 381 mamandyq boıynsha 312 kolledjde 21 myń adam oqytylýda.

«Eńbek jáne halyqty áleýmettik qorǵaý mınıstrligi 2018 jyly mektep bitirgennen keıin biliktiliksiz qalyp qoıǵan jastarǵa qosymsha 31,2 myń oryn bólip, tegin tehnıkalyq jáne kásibı bilim berýdi qolǵa almaq», - dedi D.Káletaev.

Budan basqa, jastar kásipkerligin damytý jáne jastardy jumyspen qamtý úshin mıkronesıeler alýǵa arnaıy kvotalardy engizý qarastyrylǵan.

«Joǵary oqý ornyn nemese TjKB bitirgen, biraq jumysy joq 63 myń adamdy jumyspen qamtý úshin kvotalardy ulǵaıtý jáne «Jastar tájirıbesi» jobasyna qatysatyndardyń jalaqysyn joǵarylatý sharalary qoldanylady», - dep atap ótti ol.