Darhan Káletaev hıdjab kıgen oqýshylar týraly: Máseleni sheshýge bolady

ASTANA. QazAqparat - Qoǵamdyq damý mınıstri Darhan Káletaev Túrkistan oblysynda hıdjab kıip, mektepke kelgen oqýshylar týraly pikir bildirdi, dep habarlaıdy QazAqparat tilshisi.

«Jalpy, byltyr da osyndaı jaǵdaılar tirkelgen bolatyn. Meniń oıymsha, máseleni sheshýge bolady. Tek ata-analarmen túsindirý jumystaryn júrgizý kerek. Bilim jáne ǵylym mınıstriniń oqýshy kımi úlgisi týraly erejesi, buıryǵy bar. Bul qalypty protsess. Álbette, bul másele boıynsha suraqtardyń nelikten týyndap jatqanyn da túsinemin. Osy oraıda dindar adamdardyń tarapynan túsinistik bolar dep úmittemin. Atap aıtqanda, osy másele boıynsha qazirgi tańda belsendi túrde túsindirý jumysyn qolǵa alǵan Qazaqstan Musylmandary Dinı basqarmasy qoldaý bildirer dep senemin. Biz de jumys júrgizip jatyrmyz. Biraq, aıtarym - bul jerde alyp bara jatqan problema kórip turǵan joqpyn. Jekelegen sátter bar, biz olardy eńseremiz dep oılaımyn», - dedi Ulttyq kitaphanadaǵy dóńgelek ústel bastalmaı turyp Darhan Káletaev.

Aıta ketsek, budan buryn áleýmettik jelilerde Túrkistan oblysy Maqtaral aýdanynda hıdjab kıgen oqýshylardyń mektepke kelgeni týraly vıdeo áleýmettik jelige tarap ketken bolatyn.