Darhan Káletaev elimizdegi ÚEU-dyń negizgi usynystaryn atady
«Qazirgi tańda azamattyq qoǵamdy damytýdyń 2016-2020 jyldarǵa arnalǵan ulttyq jospary júzege asyrylyp jatyr. Osynyń arqasynda ÚEU-nyń sapaly túrdegi ósiminiń kezeńi bastalyp ketti. 2003 jyldan beri Qazaqstanda ÚEU-nyń sany 5 myń bolsa, qazirge deıin 22 myńǵa jetti. Memlekettik áleýmettik tapsyrys boıynsha qarjylandyrý kólemi 2018 jyly 22 mlrd teńgege jetti. Búgingi tańda ÚEU-lardy qarjylandyrý jumystary 14 baǵyt boıynsha júrgizilip jatyr. Sonyń ishinde osy qarjylandyrýdyń úshten bir bóligi áleýmettik jobalarǵa jumsalsa, odan keıingisi bilim, jastar saıasatyn qoldaýǵa, azamattyq qoǵamdy damytýǵa, azamattardyń quqyǵyn qorǵaýǵa bólinýde», - dedi Darhan Káletaev.
Qoǵamdyq damý mınıstriniń aıtýynsha, jalpy ÚEU sektory ınstýttsıonaldyq turǵyda qalyptasyp qoıǵan.
«Bizdiń osy forým aldynda óńirlerge jasaǵan saparlarymyz úkimettik emes uıymdardy elimizdegi protsesterge kóbirek qatystyrý kerektigin kórsetip otyr. ÚEU qazirgi tańda tek granttardy alatyn ǵana uıym emes, úlken protsesterdiń qatysýshysyna aınaldy. Qazirgi tańda qoǵamdyq keńesterdiń sany 229-ǵa jetse, olardyń quramynda 4 myńǵa tarta adam jumys isteýde. 20 ortalyq memlekettik organda jáne 313 jergilikti atqarýshy organda ÚEU-larmen jumys isteýge ýákiletti ınstıtýttar engizildi», - deıdi mınıstr.
Darhan Káletaev keshe bastalǵan forým týraly keńirek aıta kele, birshama taqyryptar talqylanǵanyn atap ótti.
«Biz úkimettik emes uıymdardyń jumysyna qatysty birshama suraqtardy talqyladyq. Sonymen birge, ÚEU-lardy qarjylandyrýdyń qun jaǵynan yńǵaıly qaǵıdatpen emes, joǵary sapaly qyzmet úshin berý máselesi qaraldy. ÚEU-dardy salyqtyq jáne qarjylyq turǵyda yntalandyrý bastamalary kóterildi. ÚEU-lardy qoldaýdaǵy bıznesti qoldaý qarastyryldy. Halyqaralyq donorlyq uıymdarmen seriktesý máselesin talqyladyq. Sonymen birge, ÚEU ókilderi áleýmettik ÚEU-larǵa mıkronesıelerdi bólýdi usynady. Startap-jobalardy qoldaý úshin ınnovatsııalyq granttar men venchýrlyq kapıtaldy bólý ıdeıalary kóterilip jatyr. ıAǵnı, aıtylyp jatqan máselelerdiń bári de memleket pen ÚEU-lardyń birlesken jumysy mehanızmin jandandyrýdy kózdeıdi», - dedi D.Káletaev.
Aıta ketsek, elordadaǵy Táýelsizdik saraıynda Elbasy Nursultan Nazarbaevtyń qatysýymen VIII Azamattyq forým ótip jatyr. Forým keshe bastalǵan bolatyn.