Darhan Ábdirahymnyń ólimin qoǵamnan jasyrǵan joqpyz – Berdibek Saparbaev

NUR-SULTAN. QazAqparat – Qordaı aýdanynda bolǵan qaıǵyly oqıǵa saldarynan qaza tapqan Darhan Ábdirahymnyń ólimi qoǵamnan jasyrylǵan joq. Bul týraly búgin Úkimet otyrysynan keıin Jambyl oblysynyń ákimi Berdibek Saparbaev aıtty, dep habarlaıdy QazAqparat tilshisi.

«Onyń bastapqy tizimde nege bolmaǵanyn bilmeımin. Birden aıttyq. Keshe Darhandy jerleý rásim bolyp, oǵan qatystyq. Eshkim jasyrǵan joq, bizdiń málimetimizge sáıkes, 9 adamnyń qaza tapqanyn aıttyq. Darhan basqa aýylda, Áljan ana aýylynda turǵan. Sondyqtan bul jerde jasyrý bolǵan emes», - dedi Berdibek Saparbaev BAQ ókilderiniń saýalyna oraı.

Sonymen qatar, ol birneshe qylmystyq is qozǵalǵanyn aıtty.

«Ózderińiz biletindeı, Memleket bashysy Qasym-Jomart Kemelulynyń tapsyrmasymen vedomstvoaralyq jedel tergeý toby quryldy. Top qatarynda Bas prokýratýra, Іshki ister mınıstrligi, Ulttyq qaýipsizdik komıteti ókilderi bar. Olar qazirgi ýaqytta jumys istep jatyr. Tergeý júrgizilýde», - dedi Jambyl oblysynyń ákimi.

Eske salaıyq, 7 aqpan kúni Jambyl oblysynyń Qordaı aýdanyndaǵy Masanchı aýylynyń turǵyndary arasynda jappaı tóbeles boldy. QR Prezıdenti Qasym-Jomart Toqaev buzaqylyq sıpattaǵy jappaı tóbelesti aıyptap, arandatýshylar buny odan saıyn órshitkenin málimdedi.

Sondaı-aq vıtse-premer Berdibek Saparbaevtyń tóraǵalyǵymen úkimettik komıssııa qurylatynyn, qaza bolǵandardy jerleý, zardap shekkenderge kómektesý jumystary uıymdastyrylatynyn, qoǵamdyq tártipti buzǵandar anyqtalyp, qatań jaýapqa tartylatynyn málim etti. Bas prokýratýraǵa, Ulttyq qaýipsizdik komıtetine tıisti tapsyrma berildi.