Dárigerler Kostenko shahtasynda japa shekken kenshilerdiń jaǵdaıy týraly aıtty

<p>Professor H. J. Maqajanov atyndaǵy aýrýhanalarǵa 18 adam jetkizildi. Bir adam reanımatsııada jatyr, dep habarlaıdy Kazinform.</p>

Barlyq zardap shekkenderge medıtsınalyq kómek kórsetilýde.

"Barlyq qajetti mamandardy tarta otyryp, konsılıým ótkizildi.

15 adam Ońtústik-Shyǵys shaǵyn aýdanyndaǵy H.J.Maqajanov klınıkasyna kómirtegi totyǵymen ýlaný belgisimen tústi. Bireýi aýyr dárejede kómirtegi totyǵymen ýlaný, qalǵandary jeńil jáne ortasha dárejede ýlaný dıagnozymen aýrýhanaǵa jatqyzyldy. Ekeýi Mıhaılovkadaǵy H.J. Maqajanov klınıkasyna tústi: bireýi reanımatsııada aýyr jaǵdaıda, ekinshisi operatsııadan keıin travmatologııa bóliminde jatyr.

Sonymen, statsıonarǵa 17 adam jatqyzyldy, bir adam ambýlatorııalyq emdelýge jiberildi", - dep habarlady Qaraǵandy oblysynyń Densaýlyq saqtaý basqarmasy.

Aıta keteıik, búgin tańerteń Kostenko atyndaǵy shahtada órt bolyp, 11 adam kóz jumǵanyn, ártúrli dárejedegi jaraqattarmen aýrýhanaǵa 18 adam jetkizilgenin jazǵan edik.

Artynsha taǵy bes kenshiniń denesi tabylyp, qurban bolǵandar sany 16-ǵa jetti.

QR Prezıdenti Qasym-Jomart Toqaev qaza tapqan kenshilerdiń týǵan-týystary men jaqyndaryna kóńil aıtty.

Sondaı-aq, Prezıdent Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatýdy tapsyrdy.

Odan bólek, QR Bas prokýratýrasy Kostenko atyndaǵy shahtadaǵy órt faktisi boıynsha taý-ken nemese qurylys jumystaryn júrgizý kezinde qaýipsizdik qaǵıdalaryn buzý baby boıynsha sotqa deıingi tergep-tekserý bastalǵanyn habarlady.