Dárigerge jaqsy emdegeni úshin bir qorap kámpıt usyný - para emes - Antıkor

<p>ASTANA. KAZINFORM &ndash; Sybaılas jemqorlyqqa qarsy is-qımyl agenttigi tóraǵasynyń birinshi orynbasary Ulan Sarqulov zańnamaǵa usynylyp otyrǵan &laquo;para usyný, para ýáde etý, para talap etý&raquo; uǵymdaryna túsinik berdi.</p>

- Alǵys bildirý degende onyń astarynda neni meńzep turǵanyńyzǵa baılanysty. Eger sizge alǵysyńyzdyń ornyna mynandaı, mynandaı isteý kerek degen bolsa, alǵys retinde jasaǵan syıyńyzdyń kólemi 2 aılyq eseptik kórsetkishten (7 864 teńge – red.) assa, bul - para bolady, - dedi ol Májilistiń jalpy otyrysynan keıin ótken baspasóz máslıhatynda.

Jýrnalıst ózin jaqsy emdep shyqqan dárigerge alǵys retinde bir qorap kámpıt usynýdyń qanshalyqty zańdy ekenin surady.

- Joq, ol para emes, - dep jaýap berdi Ulan Sarqulov.

Agenttik ókili azamattar memlekettik organnyń, dárigerdiń nemese muǵalimniń qyzmetine alǵys retinde mólsheri 5 aılyq eseptik kórsetkishten (19 660 teńge – red.) joǵary dúnıe syılaǵysy kelse, arnaıy qorǵa ótkizý kerektigin eske saldy.

- Bizde arnaıy qor bar. Bireý syılyq berse, sol qorǵa ótkizemiz. Ol qor baıaǵydan bar. 5 AEK-ten asatyn somanyń bári sol qorǵa ótkiziledi, - dedi ol.

Ulan Sarqulov qandaı da bir sharýany sheshý shartymen «alǵys bildirý» para usyný bolyp esepteletinin eskertti.

- Mysaly, adam memlekettik portal arqyly kezekke turyp emdelý kerek boldy deıik. Sol kezekti jyljytý úshin «alǵys bildirgisi» kelse, ol para bolyp esepteledi. Sol úshin qoǵamnyń sanasynda para usyný, para ýáde etý, para talap etý degen uǵymdar bolmaý kerek, - dedi agenttik ókili.

Aıta keteıik, Májilistiń jalpy otyrysynda sybaılas jemqorlyqqa qarsy is-qımyl máseleleri jónindegi zań jobasy talqylanyp jatyr.