Dárigerdiń salǵyrttyǵynan BQO turǵyny aıaǵynan aıyryldy

<p>ORAL. KAZINFORM &ndash; Batys Qazaqstan oblysynyń Jánibek aýdandyq sotynda QR QK 317-baby 2-bóligine (medıtsına nemese farmatsevtıka qyzmetkeriniń kásiptik mindetterin tıisinshe oryndamaýy) sáıkes qylmystyq is qaraldy.</p>

BQO sotynyń baspasóz qyzmetinen málim etkenindeı, sottalýshy Jánibek aýdandyq aýrýhanasynda hırýrg dáriger qyzmetin atqaryp júrip, kásibı mindetterin tıisinshe oryndamaǵan.

Sot talqysynda málim bolǵanyndaı, dáriger 2023 jyly 25 qazan kúni shamamen saǵat 18.25-te aıaǵynan óndiristik jaraqat alyp, aýrýhanaǵa jetkizilgen naýqasqa salǵyrt qaraǵan. Atap aıtqanda, naýqastyń aıaǵyndaǵy jarany antıseptıktermen óńdep, nekrozdanǵan (óli ettengen) tinderin, jara shetterin kespesten tuıyq tigip tastaǵan. Saldarynan qandy iriń syrtqa shyqpaı, tigilgen jaraǵa drenaj salynbaǵan. Sosyn jarada isiný suıyqtyǵy jınalyp, ol tinderdiń qysylýyna ákelip, ınfektsııanyń paıda bolýyna áser etken.

Sodan, 2024 jylǵy 10 qarashada jábirlenýshiniń jaraqat alǵan oń jaq aıaǵyna ampýtatsııa jasalǵan. Osylaısha, onyń densaýlyǵyna aýyr zııan keltirilgen.

«Іsti qaraý barysynda jábirlenýshi ózine keltirilgen múliktik zalaldyń sottalýshymen ótelgenin, medıatsııa tártibimen tatýlasqanyn, oǵan keshirim beretinin aıtyp, qylmystyq isti toqtatý týraly aryzyn bergen. Sot qylmystyq is materıaldaryn zerttep, olarǵa baǵa bere otyryp, sottalýshynyń tarapynan jasalǵan qylmystyq áreket QR QK 11-babynyń 2-bóligine sáıkes onsha aýyr emes qylmystar sanatyna jatatynyn eskerdi. Sottalýshy QR QK 317-babynyń 2-bóliginde kózdelgen qylmystyq quqyq buzýshylyq jasaǵanymen, jábirlenýshimen medıatsııa tártibimen tatýlasýyna baılanysty QR QK 68-babynyń 1-bóligi negizinde qylmystyq jaýaptylyqtan bosatylyp, qylmystyq is toqtatyldy. Qaýly zańdy kúshine engen joq», dep habarlady vedomstvodan.

Eske sala keteıik, budan buryn BQO-da qaterli isikpen aýyratyn adamdardyń quqyǵy buzylǵany anyqtalǵanyn jazǵan bolatynbyz.