Dárejan Ómirbaevtyń «Aqyn» fılmi Berlın kınofestıvaline qatysady
Sháken Aımanov atyndaǵy «Qazaqfılm» kınostýdııasy taratqan málimetke sensek, 2022 jyly 10-20 aqpan aralyǵynda ótetin 72-shi halyqaralyq Berlın kınofestıvali «Forým» atty bedeldi baǵdarlamasyna qatysatyn birneshe fılmniń tizimin jarııalaǵan.
«Olardyń qatarynda qazaqstandyq týyndy rejısser Dárejan Ómirbaevtyń «Aqyn» fılmi de bar. Ulttyq kınony qoldaý memlekettik ortalyǵy qoldaýymen Sháken Aımanov atyndaǵy «Qazaqfılm» AQ túsirgen «Aqyn» fılmi tehnologııalar damyǵan qazirgi zamanda ónerdiń qoǵamda alatyn orny týraly oı qozǵap, poezııaǵa suranys azaıǵan dáýirde aqynnyń kúıinishi týraly syr shertedi» delingen habarlamada.
Qazaq halqynyń XIX ǵasyrdaǵy eń kórnekti aqyndarynyń biri Mahambet Ótemisulynyń qıly taǵdyry jaıynda oıǵa batqan basty keıipker názik júrekti aqyndardyń ómiri qashan da qıyn bolǵanyn túsinedi.
Fılmniń stsenarııi nemis jazýshysy German Gesseniń «Avtorlyq kesh» atty avtobıografııalyq áńgimesi jelisimen jazylǵan.
Fılmdegi basty róldi «Jigitter» tobynyń ánshisi Erdos Qanaev somdaıdy.