«Darbaza - Maqtaral», «Baqty - Aıagóz» temirjol jelileriniń qurylysy qashan bastalady

ASTANA. QazAqparat – Bıyl Almaty stansasyn aınalyp ótetin temirjol jelisiniń qurylysy bastalady. Bul týraly QR Indýstrııa jáne ınfraqurylymdyq damý mınıstri Marat Qarabaev aıtty, dep habarlaıdy QazAqparat tilshisi.

«Osy jyldyń sońyna deıin «Darbaza - Maqtaral», «Baqty - Aıagóz» syndy jobalardyń tehnıkalyq qujattamalaryn ázirleý jumystary aıaqtalýy tıis. Sodan keıin atalǵan jobalardyń qurylysyn bastaýdy mejelep otyrmyz», - dedi Marat Qarabaev mınıstrliktiń keńeıtilgen alqa otyrysynda.

Osy oraıda mınıstr byltyr elimizdiń tranzıttik áleýetin nyǵaıtýǵa baǵyttalǵan temirjol salasyndaǵy iri ınfraqurylymdyq jobalardy iske asyrý bastalǵanyn atap ótti.

«Máselen, 2022 jyldyń qarasha aıynda aýqymdy jobalardyń biri – «Dostyq-Moıynty» temirjol ýchaskesiniń ekinshi torabynyń qurylysy qolǵa alyndy. Osy jobany iske asyrý arqyly poıyzdardy ótkizý 5 esege ulǵaıtylady dep kózdelip otyr. Bıyl Almaty stansasyn aınalyp ótetin temirjol jelisiniń qurylysyn bastap, sondaı-aq tranzıttik ýchaskelerdegi tar sheńberli jerlerdi joıý jónindegi jumysty jalǵastyrý josparlanǵan», - dedi ol.