Darbaza - Maqtaaral temirjol jelisi qashan salynady
«Búgingi kúni kórshi bes elmen 27 temirjol shekara pýnkteri arqyly baılanys ornatylǵan. Onyń basym bóligi óziniń ótkizý qabiletin tolyqtaı qoldanýda. Jyl qorytyndysy boıynsha Qytaı jáne Ortalyq Azııa baǵyttaryndaǵy Dostyq, Altynkól jáne Saryaǵash stantsııalarynyń tehnıkalyq qýattylyǵy tolyq júkteledi», - dedi M. Qarabaev búgingi Úkimet otyrysynda.
Onyń aıtýynsha, Dostyq stantsııasyn jańǵyrtý aıasynda Dostyq – Moıynty ýchaskesinde ekinshi jol salý qarastyrylyp otyr.
Sonymen qatar, Qytaı tarapymen tıisti kelissózder júrgizilip, Qorǵas shekaralyq pýnktine keletin Tszınhe – Qorǵas ýchaskesine ekinshi joldardy salý boıynsha ýaǵdalastyqqa qol jetkizildi.
«Atalǵan jumystar aıaqtalsa, jalpy eki shekaralyq stantsııanyń ótkizý qabileti taǵy 14 mln tonnaǵa artyp, jylyna 56 mln tonnany quramaq. Sondaı-aq, Baqty – Tachen úshinshi ótkizý pýnktin ashý josparda bar. Bul joba shekaradaǵy temirjol ınfraqurylymynyń qýatyn taǵy 20 mln tonnaǵa arttyryp, jalpy Qytaı baǵytyndaǵy temirjoldyń ótkizý qabiletin jylyna 76 mln tonnaǵa deıin jetkizedi», - dedi Kólik mınıstri.
Oǵan qosa, Ortalyq Azııa baǵyty boıynsha jylyna 10 mln tonnaǵa deıin júk ótkizý qýatyn qamtamasyz etetin Darbaza – Maqtaaral temir jol jelisi salynady. Jyl sońyna deıin Darbaza – Maqtaaral jobasynyń qurylysy bastalady.
«Shekara pýnkterinen bólek, magıstraldy jelilerdi jańǵyrtý jumystary júrgizilýde. Búgingi tańda magıstraldy joldardyń uzyndyǵy 16 myń shaqyrymǵa jetedi, onyń tek 5 myń shaqyrymy eki jolmen, 4200 shaqyrymy elektr júıesimen qamtamasyz etilgen. Úzdiksiz tasymaldaýdy qamtamasyz etý men magıstraldy temirjol jelileriniń qýatyn arttyrý úshin bıyl 567 shaqyrym ýchaskede kúrdeli jóndeý jumystary júrgizildi. Sonymen qatar 1300 shaqyrym bolatyn 4 temirjol jobasynyń qurylysy boıynsha jumys atqarylýda», - deıdi M. Qarabaev.
Ótken jyly Dostyq – Moıynty ýchaskesinde ekinshi joldardyń qurylysy bastaldy. Qazir qurylys-montajdaý jumystary belsendi júrip jatyr. Jer tósemin ornatý jumystary 70%-ǵa oryndalǵan, 316 shaqyrym rels-shpal tory qurastyrylyp, 151 shaqyrymynda tóseý júrgizilgen. Jobany iske asyrý ýchaske qýattylyǵyn 5 ese arttyrady.
Ótken aptada Almaty stantsııasy aınalma jolynyń qurylys-montajdaý jumystary bastaldy.
Baqty – Aıagóz jobasyn ınvestor qarajaty esebinen iske asyrý josparlanyp otyr. Búginde tıisti sheshimder qabyldanyp, joba qurylysyn bastaý boıynsha daıyndyq júrgizilýde.