Danııar Eleýsinovtyń promoýteri GGG-men birge jumys istegisi keledi

ASTANA.QazAqparat - Qazaqstandyq boksshy Danııar Eleýsinovtyń promoýteri Eddı Hırn orta salmaqtaǵy álemniń eks-chempıony Gennadıı Golovkınge (38-1-1, 34 KO) qyzyǵýshylyq tanytyp otyr, dep habarlaıdy QazAqparat boxingscene-qa silteme jasap.

Tanymal promoýterdiń sózine qaraǵanda, ol Gennadıı Golovkın, Saýl Alvares (50-1-2, 34KO) jáne Mennı Pakıao (60-7-2,39KO) syndy tanymal boks juldyzdarymen jekpe-jektiń telekórsetilimi boıynsha kelisimshart jasaspaqshy.

«Men GGG-nyń menedjeri Tom Leffermen jaqsy qarym-qatynastamyn, biz jekpe-jekterdi uıymdastyrýda áriptes bolǵanbyz. Men oǵan Gennadıı Golovkındi bizdiń DAZN telekórsetilimi aıasynda bokstasqanyn qalaıtynymyzdy aıttym. Sonymen qatar, men Alvares jáne Pakıaomende bul másele jóninde sóılestim. Árıne, úsheýimende kelisimge kelemin dep aıta almaımyn. Alaıda, olardyń biri qatarymyzǵa qosylatynyna senimdimin» ,-dedi Eddı Hırn.

Aıta keteıik, HBO telearnasy Gennadıı Golovkın men Saýl Alvarestyń ekinshi jekpe-jeginen keıin, kásipqoı boks teletaratylymy bazarynan ketetinin jarııalady. Osylaısha, Showtime jáne ESPN telearnalary aldaǵy ýaqytta GGG, Canelo boks keshterin uıymdastyrýǵa múddeli bolyp otyr.

Eddı Hırn bul kúnde Danııar Eleýsinov, Kell Brýk, Denıel Djekobs jáne Entonı Djoshýa syndy tanymal boksshylardyń promoýteri.