Danııar Eleýsinovtiń kásibı rıngtegi tórtinshi aıqasy tikeleı efırden kórsetiledi

ASTANA. QazAqparat - «Habar» telearnasy Danııar Eleýsinovtiń (3-0, 1KO) kásipqoı bokstaǵy tórtinshi jekpe-jegin tikeleı efırden kórsetedi, dep habarlaıdy QazAqparat.

Eleýsinovtiń aldaǵy jekpe-jegi 20 qazan kúni Amerıkanyń Boston qalasynda ótetinin buǵan deıin jazǵan bolatynbyz. Onyń qarsylasy - 30 jastaǵy amerıkalyq boksshy, «Dáýit» laqap atymen belgili Mett Doertı (8-5-1, 4KO).

«Qazaqstannyń kásipqoı boksy» VKontakte áleýmettik jelisinde málim etkendeı, alty raýndqa eseptelgen aıqasty Qazaqstan aýmaǵynda «Habar» telearnasy tikeleı efırden kórsetedi. Translıatsııa jeksenbi kúni, Astana ýaqytymen saǵat 06.00-de bastalady.

Aıta keteıik, 27 jastaǵy Eleýsinovtiń múddesin qorǵaıtyn Matchroom Boxing promoýterlik kompanııasy onyń kásibı bokstaǵy besinshi jekpe-jeginiń qashan jáne qaıda ótetinin de jarııalaǵan bolatyn. Onyń qarsylasy ázirge belgisiz.

Eske salaıyq, Danııar Eleýsinov bıylǵy 4 tamyzda ótken jekpe-jekte vengrııalyq Gabor Gorbıchti (26-13, 16KO) upaı sanymen jeńgen bolatyn. Budan keıin qazaqstandyq boksshynyń BoxRec.com tanymal saıtyndaǵy reıtıngi birden 75 satyǵa joǵarylady.