Danııar Eleýsinov AQSh-ta qaıtadan jattyǵa bastady

ASTANA. QazAqparat – Jartylaı orta salmaqtaǵy qazaqstandyq boksshy Danııar Eleýsinov (11-0, 6 KO) AQSh-taǵy jattyǵýyn qaıta bastady, dep habarlaıdy QazAqparat Sports.kz portalyna silteme jasap.

Boksshy óziniń Instagram paraqshasynda Maıamıdegi (Florıda shtaty) jattyǵý zalynda aýyr qapty soǵyp jatqan vıdeosyn jarııalady. «Qazaq naızaǵaıy» ótken jyldyń sońynan beri AQSh-ta júr.

Danııar Eleýsinov óziniń sońǵy jekpe-jegin 2021 jyldyń jeltoqsan aıynda Astanada ótkizgen. Onda tóreshilerdiń biraýyzdan qabyldaǵan sheshimimen ol argentınalyq Hýan Ernan Lealdy (15-3, 4 KO) jeńip, IBO tujyrymy boıynsha jartylaı orta salmaqtaǵy álem chempıony ataǵyn jeńip aldy.

Alaıda, ótken jyldyń aıaǵynda sportshynyń Halyqaralyq boks uıymy (IBO) nusqasy boıynsha jartylaı orta salmaqtaǵy álem chempıony ataǵynan aırylǵany jarııa boldy. Bul boksshynyń jekpe-jekteri arasyndaǵy ýaqyt uzaqtyǵymen baılanysty bolýy múmkin. IBO erejesi boıynsha aýyr salmaqty qospaǵanda, árbir salmaq sanatyndaǵy álem chempıondary toǵyz aıda bir ret (aýyr salmaqtaǵylar úshin bul kezeń – bir jyl) dárejesin qorǵaýdy talap etedi. Erejeni buzýǵa tek medıtsınalyq sebep boıynsha jáne/nemese IBO-nyń sheshimimen ǵana ruqsat beriledi.

Bul rette Danııar Eleýsinov mansabyna menedjerler kedergi keltirdi dep sanaıdy.

Foto: sports.kz