Danııar Áshimbaev: Prezıdent – eldegi jaǵdaıdan jan-jaqty habardar adam

ASTANA. QazAqparat – Búgin Memleket basshysy Qasym-Jomart Toqaev eldiń áleýmettik-mádenı damýy jóninde keńes ótkizdi. Keńeske mınıstrler jáne ákimdermen qatar alǵash ret máslıhat depýtattary qatysty. Osy oraıda saıasattanýshy Danııar Áshimbaev Prezıdenttiń qandaı túpki oıyna jiti nazar aýdarý qajettigin aıtty, dep habarlaıdy QazAqparat tilshisi.

Onyń atap ótýinshe, Prezıdenttiń búgingi, sonymen qatar Úkimet otyrystarynda jáne halyqqa Joldaýy men óńirlerdi damytý máseleleri jónindegi keńesterde sóılegen sózine jasalǵan saraptamadan Memleket basshysynyń eldegi jaǵdaıdan jan-jaqty habardar ekenin baıqaýǵa bolady.

«Ákimshiliktiń málimetterdi jedel jınap, usynys beretini túsinikti. Ókinishke qaraı, Prezıdenttiń keı tapsyrmalarynyń oryndalmaý ne bolmasa qaǵaz júzinde ǵana oryndalýy tendentsııasy bar. Problemaly faktorlar da oryn alyp jatyr: bir jaǵynan qolaısyz konıýnktýra, ekinshi jaǵynan atqaminerliktiń dástúrli iritkisi. Memleket basshysynyń Úkimettiń ne bolmasa mınıstrlikterdiń sylap-sıpaǵan tsıfrlaryna qaramastan qandaı mindetterge jiti nazar aýdarý qajettigin eske salyp otyrýy úshin «qolmen» basqarý rejımine barýǵa májbúr ekeni túsinikti. Prezıdentte sheneýnikter tolyqqandy jáne jarııa etýge qulyqty emes aspektilerdi qamtıtyn aqparat bar», - dedi Danııar Áshimbaev.

Memleket basshysy halyqpen keri baılanys máselesine de jiti nazar aýdardy.

Osy rette saıasattanýshy Prezıdenttiń qatysýymen ótken keńeske barlyq deńgeıdegi máslıhat depýtattarynyń shaqyrylýyna nazar aýdartady.

«Máslıhat – halyq pen jergilikti deńgeıdegi memlekettiń ózara is-qımylynyń birinshi negizgi joly. Sońǵy jyldary máslıhattardyń dıalog júıesinen syrǵyp qalǵanyn kórip otyrmyz. Saılaý ótkennen keıin olardy umytatyn edik jáne máslıhattyń tyńdaý ótkizýi nemese ákimdikterdiń jumysyn baqylaǵany aıryqsha biline bermeıtin. Sondyqtan da ótken jyly saıası konstıtýtsııalyq reforma aıasynda máslıhatty jasaqtaý tártibi ózgerdi, olardyń ókilettigi keńeıdi. Búginde máslıhatqa úlken máseleler táýeldi: dál solar ákimdik sheshimderin qalyptaıtyn fılıal emes, olardyń jergilikti jerde sheshilý joldaryn ózektendiretin jáne baqylaıtyn organǵa aınalýy tıis. Prezıdent te sóz sóıleýi barysynda jınalǵan máslıhat ókilderine olardyń birinshi kezektegi mindeti - jergilikti turǵyndardyń múddesin qorǵaý ekendigin, jeńil-jelpi tanymaldyqqa boı aldyrmaý kerektigin aıtty», - dedi spıker.