Danııar Aqyshev kompanııalardan nesıe qaryzyn qalaı qaıtarýǵa bolatynyn aıtty
Eske sala ketsek, QR Prezıdenti Nursultan Nazarbaevtyń tóraǵalyǵymen ótip jatqan Úkimettiń keńeıtilgen otyrysynda Memleket basshysy Nursultan Nazarbaev bıznesti qoldaý úshin bólingeli otyrǵan 600 mlrd teńgeni tıimdi ıgerýdi tapsyrǵan bolatyn. Óz sózinde Memleket basshysy osy ýaqytqa deıin nesıe qaryzyn qaıtara almaǵan kompanııalardy qylmystyq jaýapkershilikke tartyp, qaıtarymdy júrgizý kerektigin eskertken edi.
Úkimet otyrysynda Danııar Aqyshev bul baǵyttaǵy naqty tetikterdi usyndy.
«Biz qarjy sektoryndaǵy úlgimen naqty sektorda tazartý saıasatyn júrgizýdi usynamyz. Naryqtan álsiz kompanııalardy shyǵarý boıynsha júıeli jumys júrgizip, qaıta qurylymdaý nemese bankrottaý kerek. Osylaısha, aktıvter jumysy turaqty kompanııalarǵa berilýi tıis», - dedi Danııar Aqyshev.
Ulttyq bank tóraǵasy sonymen birge, álsiz kompanııalardy memlekettik qoldaý tetikterinen aıyrý kerektigin de atap ótti.
«Memlekettik qarjylandyrý tikeleı iri ınfraqurylymdyq jobalarda saqtalýy tıis. Bankrot protsedýrasynyń tıimdiligin arttyrý kerek», - dedi ol.
Eske sala ketsek, Úkimet úıinde QR Prezıdenti Nursultan Nazarbaevtyń tóraǵalyǵymen Úkimettiń keńeıtilgen quramdaǵy otyrysy ótip jatyr. Elbasynyń qatysýymen Úkimettiń mundaı otyrysy jyl basynda turaqty túrde ótkiziledi. Búgingi jıynǵa Úkimet músheleri, Astana, Almaty jáne Shymkent qalalary men oblystardyń ákimderi, ortalyq memlekettik organdar men mınıstrlikter basshylary qatysýda.