Danııar Aqyshev BJZQ qarjysynyń «jelge ushýyna» Kelimbetovtyń qatysy baryn ymdady

ALMATY. QazAqparat - Bas bankır Danııar Aqyshev búgin BJZQ ınvestıtsııalaryna qatysty óz pikirin bildirdi, dedi QazAqparat tilshisi.

Onyń aıtýynsha, 2014 jyldyń qazanynda BJZQ aktıvterine Halyqaralyq Ázirbaıjan bankiniń qundy qaǵazdary 250 mln dollarǵa satylyp alynǵan. Qundy qaǵazdar offshordaǵy kompanııaǵa ornalastyryldy.

«Bul kezde sheshimdi BJZQ emes, Ulttyq bankte otyrǵandar qabyldaǵan. Endi bul máseleni qalaı sheshemiz degende, Londonda ótken otyrysta qaryzdy qaıta qurylymdaýdyń 3 tásili aıtyldy. Birinshiden, BJZQ aktıvterin Ázerbaıjan memlekettik qundy qaǵazdary túrinde 200 mln dollarǵa 5 paıyzben aıyrbastaý, ekinshiden 250 mln dollardy 15 jylǵa 3 paıyzben nemese 7 jylǵa 3,5 paıyzben aıyrbastaý. Úsheýi de shyǵynǵa batyrady», - dedi ol.

Bas bankır Ulttyq banktiń barynsha aqshany az shyǵynmen qaıtarýǵa tyrysyp jatqanyn aıtty.

«Zeınetaqy aktıvterin ınvestıtsııalaý týraly sheshimdi arnaıy keńesti basqarǵan Ulttyq bank tóraǵasy qabyldaǵan. 2014 jyldyń sáýirinde tujyrymdama men quraldar tizimi shyqty. Deklaratsııa shyqqan soń ınvestıtsııa kólemi de anyqtaldy. 2016 jyldan bastap basty fýnktsııalar qordy basqarý keńesine berildi. Ony memleket basshysy basqarady», - dedi ol.

Danııar Aqyshev aıtqandaı, 2016 jyldan bastap UB Ázerbaıjan úkimetine, Ázerbaıjan bankine talap qoıa bastady.

«Biraq olar merziminen buryn qaryzdy qaıtarýǵa kelispedi. Mámileniń mán-jaıyna qatysty kóp suraq jaýapsyz bolyp otyr. UB isti quqyq qorǵaý organdaryna beredi», - dedi Aqyshev.

Aıta ketý kerek, 2014 jyly Ulttyq bankti Qaırat Kelimbetov basqarǵan bolatyn.

Esterińizge sala keteıik, Qazaqstan Biryńǵaı jınaqtaýshy zeınetaqy qorynyń aktıvteri Halyqaralyq Ázerbaıjan bankine ınvestıtsııalanǵany jaqynda belgili boldy.

Al bank bolsa defolt jaǵdaıynda. Mamandardyń aıtýynsha, salymshylardyń 71,3 mlrd teńgesi qaıtpaı qalatyn qaýpi bar.