Danııada merziminen buryn parlament saılaýy ótedi

ASTANA. QazAqparat - 1 qarashada Danııada kezekten tys parlament saılaýy ótedi. Bul týraly QazAqparat Euronews-ke silteme jasap habarlaıdy.

«Qaýipsizdik saıasaty, energetıkalyq saıasat jáne ekonomıkaǵa qatysty halyqaralyq daǵdarys jaǵdaıynda parlament saılaýyn ótkizý birtúrli kórinedi. Degenmen, Danııa parlamentindegi kópshilik dál osyny qalaıdy. Sondyqtan búgin men mártebeli Korolevaǵa Danııa parlamentine saılaýdy uıymdastyrý týraly habarladym», - dedi premer-mınıstr Mette Frederıksen.

Danııanyń premer-mınıstri men koalıtsııadaǵy seriktester arasyndaǵy kıkiljińge kúzenderdiń óltirilýi sebep bolǵan. 2020 jyly Mette Frederıksen úkimeti 17 mln janýardy uıyqtatyp óltirý týraly sheshim qabyldady. Buǵan kúzenderdiń keıbirinde koronavırýs mýtatsııanyń anyqtalýy sebep edi. 2022 jyldyń maýsymynda arnaıy komıssııa bul sheshimdi zańsyz dep tanydy.

Aıta ketsek, pandemııaǵa deıin Danııa kúzen júnin álemdegi eń iri eksporttaýshy el bolǵan.

Foto: offnews.bg