Danııa Espaevanyń shtaby Qyzylordada dóńgelek ústel ótkizdi

QYZYLORDA. QazAqparat - Qyzylorda qalasyndaǵy Stýdentter saraıynda QR Prezıdenttigine úmitker Danııa Espaevanyń respýblıkalyq shtaby men «Aq jol» partııasynyń Qyzylorda oblystyq fılıaly jıyn ótkizdi. Bul jóninde partııanyń baspasóz qyzmeti habarlady.

«Qazaqstan halqynyń rýhanı-mádenı salasyn damytý» taqyrybyndaǵy dóńgelek ústelge «Aq jol» partııasy tóraǵasynyń orynbasary, aqyn Qazybek Isa men partııa tóraǵasynyń orynbasary D.V. Vasılev qatysyp, sóz sóıledi.

Ashyq pikir alańy retinde ótken jıynǵa QR Prezıdenttigine úmitker D. Espaevanyń aımaqtyq shtaby músheleri, BAQ ókilderi qatysty. Basqosýda Qyzylorda oblysynyń «Rýhanı jańǵyrý» ortalyǵy jetekshisi, Qorqyt ata atyndaǵy QMÝ tarıhshylary men oqytýshylary baıandama jasap, oı-pikirlerin bildirdi.

Dóńgelek ústelde «Aq jol» partııasynyń «Rýxanı jańǵyrý» baǵdarlamasy aıasynda atqarǵan isteri, ulttyq múddeniń qorǵalýy, memlekettik tildiń damýy, mádenıettiń máıekti máseleleri qozǵaldy. Bilim salasyndaǵy qordalanǵan máseleler de ótkir aıtyldy.

Jıynǵa Qazaqstandaǵy prezıdent saılaýyn xalyqaralyq baqylaýshylar toby da qatysty.