Danııa Espaevanyń senimdi ókilderi Jambyl oblysyn aralap júr

TARAZ. QazAqparat - Qazaqstan Respýblıkasy Prezıdenttigine úmitker Danııa Espaevanyń senimdi ókilderi Azat Perýashev, Bolat Ótepbaev, Asan Qoshmambetov jáne oblystyq partııa uıymynyń belsendileri Jambyl oblysynda birqatar kezdesý ótkizdi. Bul jóninde «Aq jol» partııasynyń baspasóz qyzmeti habarlady.

Alǵashqy kezdesý Baızaq aýdanynyń ortalyǵy Sarykemer aýylyndaǵy Mádenıet úıinde saılaýshylardyń belsendi qatysýymen ótti. Senimdi ókilderge áleýmettik, zeınetaqy, kópbalaly analarǵa beriletin járdemaqy jáne halyqty jumyspen qamtý salalary boıynsha kóptegen suraqtar qoıyldy. Kezdesý barysynda jınalǵan kópshilik Danııa Espaevanyń ómiri men qyzmetine qyzyǵýshylyq tanytty.

Budan keıin respýlıkalyq shtab ókilderi Qostóbe aýylynda shaǵyn bıznes ókilderi jáne sharýa qojalyq ókilderimen kezdesti. Kezdesý Qostóbe aýyldyq okrýgynda ótti. Senimdi ókilderge memleket tarapynan aýyl sharýshylyǵymen aınalysatyn kásipkerlerge beriletin sýbsıdııa men nesıe boıynsha kóptegen suraqtar qoıyldy.

Kelesi kezdesý Taraz qalasyndaǵy «Qoshmambetov jáne K» JShS mekemesiniń májilis zalynda ótti. Oǵan Taraz qalasynyń iri, orta jáne shaǵyn kásipkerleri qatysty. Azat Perýashev Parlament Májilisinde «Aq jol» fraktsııasy depýtattarynyń atqarǵan jumystaryna qysqasha sholý jasap, prezıdenttikke úmitker Danııa Espaevanyń saılaýaldy baǵdarlamasyn túsindirip berdi.