Danııa Espaevanyń saılaýaldy shtaby Ereımentaýda boldy

NUR-SULTAN. QazAqparat - QR Prezıdenti saılaýyna «Aq jol» partııasynan úmitker Danııa Espaevanyń saılaýaldy shtaby Aqmola oblysynyń Ereımentaý aýdanynda turǵyndarmen kezdesti. Bul týraly QazAqparat partııanyń baspasóz qyzmetine silteme jasap habarlaıdy.

Azat Perýashev jetekshiligindegi úgit tobynyń syrtqy otyrysyna Májilis depýtaty Erlan Barlybaev, «Aq jol» partııasy tóraǵasynyń orynbasarlary Qazybek Isa men Dmıtrıı Vasılev, ortalyq qyzmet hatshysy Asylhan Qojahmetov jáne shtabtyń ózge de músheleri qatysty.

Respýblıkalyq shtabtyń jetekshisi Azat Perýashev agrotehnıkalyq kolledjde oqytýshylar men saılaýda daýys berý quqyǵyna ıe 18-ge tolǵan stýdent úmitkerdiń saılaýaldy baǵdarlamasymen tanystyrdy. Kolledjde bolashaq fermer, qurylysshy, tiginshi, temir ustalary bilim alýda. Bıyl kolledj alǵash ret «Serpin» baǵdarlamasy boıynsha bolashaq talapkerlerdi ońtústik aımaqtardan qabyldap almaq. Josparda 60 adamdyq jataqhanany keńeıtip, jóndeý jumystaryn júrgizý bar.

Danııa Espaevanyń saılaýaldy baǵdarlamasyn talqylaý barysynda osy jóninde Azat Perýashev ta aıtyp ótti.

«Jumyssyzdyq pen jumysqa turǵyzý máseleleri búgingi kúni ózekti. Osyǵan baılanysty jumys izdeý mindetti emes ekendigin, onyń ornyna óz jumysyńyzdy ashýǵa bolatyny týraly aıttyq. Bizdiń úmitkerdiń saılaýaldy baǵdarlamasynda kásipkerlikti, onyń ishinde aýyl sharýashylyǵy salasynda, ashýǵa baılanysty naqty usynystar bar», - dedi Azat Perýashev.

Sol kúni Maltabar selosynyń saılaýshylarymen de kezdesý ótti. Jergilikti turǵyndardyń basym bóligi aýyl sharýashylyǵymen aınalysady. Seloda mal sharýashylyǵy jaqsy damyǵan. Aýyl turǵyndary baǵdarlamanyń shaǵyn jáne orta bıznesti, shaǵyn fermerlik sharýalyǵyn yntalandyrý boıynsha usynystaryna qoldaý bildirdi.