Danııa Espaeva zańdardaǵy tolyqtyrýlarǵa qatysty: Jastardyń pikirine nazar aýdarý kerek

NUR-SULTAN. QazAqparat – Parlament Májilisiniń depýtaty Danııa Espaeva Prezıdent qol qoıǵan «Qazaqstan Respýblıkasyndaǵy saılaý týraly» Konstıtýtsııalyq zańyna tolyqtyrýlar engizý týraly» Konstıtýtsııalyq zańy men «Saıası partııalar týraly» zańyna ózgeris pen tolyqtyrýlar engizý týraly» Zańyna qatysty pikir bildirdi, dep habarlaıdy QazAqparat tilshisi.

«Memleket basshysy qol qoıǵan zańdarǵa toqtalsaq, birinshi kezekte bul qujatta partııalyq saılaý tizimderinde áıelder men jastar úshin keminde otyz paıyz mólsherindegi kvotany engizýge qatysty bolyp otyr. Ekinshiden, saıası partııalardy qurý úshin qoldanystaǵy sandyq tirkeý talabyn eki ese tómendetý eskerilgen. Eger bul kórsetkish 40 myńǵa teń bolsa, endi qabyldanǵan zańǵa sáıkes talaptar aıtarlyqtaı ózgerdi. Endi saıası partııany tirkeý úshin onyń quramynda jıyrma myń múshesi bolsa jetkilikti. Árıne, bul qadam elimizde saıası partııalardy qurýdy jeńildetedi. Ózderińiz bilesizder, Memleket basshysy Ulttyq qoǵamdyq senim keńesiniń ekinshi otyrysynda, tıisti birqatar usynys jasaǵan edi. Sondyqtan osyny ýaqyt aǵymy dep baǵalaǵan jón», - dedi D. Espaeva.

Osy oraıda zańnamadaǵy tyń qadamdar óte mańyzdy ekenin atap ótti.

«Atap aıtqanda, zańnama áıelder men jastarǵa memlekettik talqylaýlar kezinde belsendi qatysýǵa múmkindik beredi. Sondyqtan endi jastar men áıelderdi bul protseske jumyldyrýǵa erekshe nazar aýdarylǵan», - dedi depýtat.

«Bul der kezinde qabyldanǵan zań dep oılaımyn. Jalpy, bizde elimizdiń qoǵamdyq-saıası ómirine belsene qatysýǵa qaýqarly áıelder de, jastar da az emes. Aldaǵy ýaqytta olardyń jemisti jumysyn kóretin bolamyz», - dedi Danııa Espaeva.

Onyń paıymynsha, áıelderdiń qoǵamdyq-saıası ómirge belsendi tartylýy ońtaıly nátıje beredi. Óıtkeni qoǵamdaǵy áleýmettik máselelerge qatysty birqatar jaǵdaılardy áıelder kóterýde.

«Menińshe, qazirgi jastar kreatıvti ári batyl. Sondyqtan biz olardyń pikirine nazar aýdarǵanymyz jón, budan Parlament pen máslıhattar utady», - dedi D. Espaeva.

Budan buryn habarlanǵandaı, Memleket basshysy «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna tolyqtyrýlar engizý týraly» Qazaqstan Respýblıkasynyń Konstıtýtsııalyq zańyna qol qoıdy.

Sonymen qatar, Prezıdent «Saıası partııalar týraly» Qazaqstan Respýblıkasynyń Zańyna ózgeris pen tolyqtyrýlar engizý týraly» Qazaqstan Respýblıkasynyń Zańyna qol qoıdy.

Eske sala ketsek, 2019 jyly 20 jeltoqsanda QR Prezıdenti Qasym-Jomart Toqaev Ulttyq qoǵamdyq senim keńesiniń ekinshi otyrysynda, qoldanystaǵy saıası júıeni reformalaýǵa baǵyttalǵan birqatar usynys jasaǵan edi.

Memleket basshysy partııalyq saılaý tizimderinde áıelder men jastarǵa arnalǵan mindetti 30 paıyz kvotany qarastyrý jáne saıası partııalardy qurý úshin tirkeý talabyn 40 myńnan 20 myń adamǵa deıin tómendetý qajettiligin atap ótip «biz partııalarǵa jáne saılaýǵa qatysty Zańdardy birte-birte ózgertýimiz kerek» degen bolatyn.

Budan buryn habarlanǵandaı, sáýir aıynda Májilistiń jalpy otyrysynda Ádilet mınıstri mınıstri Marat Beketaev saıası partııalardy qurý tártibi jeńildeıtinin aıtqan edi.