Danııa Espaeva Taldyqorǵanda zaýyt jumysshylarymen kezdesti

TALDYQORǴAN. QazAqparat - Danııa Espaeva saılaýaldy baǵdarlamasyn tanystyrý úshin Taldyqorǵanǵa keldi. Úmitker eńbek ujymdarymen kezdesip, óz tuǵyrnamasyn tanystyrdy, dep habarlaıdy QazAqparat.

Kandıdat Taldyqorǵandaǵy «Qaınar» akkýmýlıator zaýytynyń jumysshylarymen kezdesti. Kásiporyn tsehtarynyń birinde Danııa Espaeva óziniń saılaýaldy tuǵyrnamasyndaǵy negizgi máselelerdi túsindirdi. Atap aıtqanda, kásipkerlikti qoldap, orta jáne shaǵyn bıznesti damytýǵa kóńil bólý, sybaılas jemqorlyqpen kúresip, offshorlyq esep-shottardaǵy qarjyny elge qaıtarý syndy mańyzdy baǵyttardy qolǵa alatynyn jetkizdi.

«Qaınar akkýmýlıator zaýyty memleketten 2,5 mlrd teńge qoldaý alǵan. Búgingi kúnge deıin tólengen salyq 3,5 mlrd teńgeden asqan. Ol birinshiden. Ekinshiden 800 qosymsha jumys orny berilgen. Meniń baǵdarlamamda osyndaı zaýyt, fabrıkalarǵa, óndirýshilerge memleketten tek aqshalaı kómek kórsetpeı, oǵan qosymsha salyqty tómendetý jaıynda jazylǵan», - dedi Danııa Espaeva.

Sondaı-aq kandıdatty qoldaýshy top qaladaǵy «Nur Avıtseným» medıtsına ortalyǵynyń qyzmetkerlerimen de júzdesti.

Eske sala ketsek, keshe QR Prezıdenttigine kandıdat Qasym-Jomart Toqaev Respýblıkalyq qoǵamdyq shtabqa kelip, qyzmetkerlermen kezdesken bolatyn.

Al, QR Prezıdenttigine kandıdat Jambyl Ahmetbekov resmı saıtynda saılaýaldy tuǵyrnamasyn jarııalady.