Danııa Espaeva: Qazaqstandyqtardy el tarıhyndaǵy mańyzdy kúnniń sátti ótýimen quttyqtaımyn

NUR-SULTAN. QazAqparat - «Aqjol» partııasynyń atynan kezekten tys prezıdenttik saılaýǵa túsken Danııa Espaeva saıası naýqannyń aldyn ala qorytyndysynan keıin óz pikirimen bólisti, dep habarlaıdy QazAqparat tilshisi.

«Aldymen, barsha qazaqstandyqtardy elimizdiń tarıhynda mańyzdy bolyp tabylatyn aıtýly kúnniń sátti ótýimen quttyqtaımyn. Onyń ishinde, meni qoldap daýys bergen otandastaryma sheksiz alǵysymdy aıtamyn. Búgindikke uıaly telefonyma qońyraý shalyp, qoldaý bildirýshilerdiń sanynda shek bolmady. Sondaı-aq, óz partııalastarym - aqjoldyqtarǵa rızashylyǵymdy bildiremin. Saılaýǵa kelsek, óte tartysty ótti. Sońǵy nátıjeni erteń biletin bolamyz», - dedi D. Espaeva.

Sonymen qatar kandıdat saılaýǵa qatysýdan ómirlik jáne qyzmettik tájirıbe jınaǵanyn aıtyp ótti.

«Saılaý - men úshin úlken mektep boldy. Óz basyma kerekti dúnıe jınadym. Ásirese, óńirlerdegi halyqpen kezdesý barysynda kóptegen málimetterge qol jetkizdim. Aldaǵy ýaqytta maǵlumattarmen tereńinen tanysatyn bolamyn. Al nátıjege kelsek, aldyn ala qorytyndy boıynsha, 3-oryndamyn. Ol men úshin úlken kórsetkish. Odan bólek, táýelsiz Qazaqstan tarıhynda prezıdenttikke kandıdattar arasynda alǵash áıel bolyp qaldym. Bul qýantady», - dedi ol.

Kandıdattyń saılaý shtabynda onyń ókilderi men qoldaýshylary jınaldy.

Exit-poll nátıjesine súıensek, «Qoǵamdyq pikir» ınstıtýtynyń ókilderi júrgizgen saýalnamaǵa sáıkes, prezıdenttik saılaý barysynda Danııa Espaevaǵa elektorattyń 5,32 paıyz daýys berdi. Al «Jastar» ǵylymı-zertteý ortalyǵynyń saýalnama qorytyndysy boıynsha, D. Espaevaǵa halyqtyń 4,78 protsenti qoldaý bildirgen.