Danıal Ahmetov Semeıde kópbalaly analardy merekelerimen quttyqtady
Kezdesý barysynda «Altyn alqa» ıegeri, «Ana men bala» qoǵamdyq birlestiginiń jetekshisi Anar Súleımenova aımaq basshysyna kópbalaly analardyń rızashylyǵyn jetkizdi.
«Kópbalaly otbasylarǵa AÁK, kepildendirilgen áleýmettik paket, memlekettik granttar jáne jumysqa ornalastyrý syndy qoldaýlar kórsetilýde. Sol úshin sizderge alǵysymyz sheksiz», - dedi ol.
Danıal Ahmetov kele jatqan Halyqaralyq áıelder kúnine oraı ardaqty analarǵa izgi tilegin aıtty.
«Barlyq áıelder men kópbalaly analardy 8 naýryz merekesimen shyn júrekten quttyqtaımyn! Memleket sizderge ary qaraı da kómek kórsetedi. Áleýmettik qoldaý bıyl da jalǵasady. Bul balabaqshalarda tegin oqytý, búldirshinderdi mektep formasymen jáne ystyq tamaqpen qamtamasyz etý. Sondaı-aq kezekte turǵandarǵa baspana berý maqsatynda da arnaıy baǵdarlama iske asyrylmaq», - dedi ákim.
Áıelder qaýymy oblysta kópbalaly analarǵa arnalǵan «Baqytty otbasy» ortalyqtaryn ashýdy usyndy. Sol jerde olar zańgerlik keńes pen psıhologııalyq qoldaý alǵylary keledi. Shara sońynda «Eńbek» memlekettik baǵdarlamasy aıasynda byltyr tigin sheberhanasyn ashýǵa grant alǵan kópbalaly ana Jańyl Joldasheva óńir basshysyna qoldan tigilgen shapan syılady.