Danıal Ahmetov: Aýdandyq polıtsııa bólimshesin jóndeýge 120 mln teńge bólý – negizsiz
Aımaq basshysy Katonqaraǵaı aýdanyna jasaǵan jumys saparynda áleýmettik jáne ınfraqurylymdyq nysandardy salý jáne jóndeý jumystarynyń barysyn qadaǵalap, jylytý qazandyǵy men polıtsııa bóliminiń ǵımaratyn jańartý josparlarymen tanysty.
Danıal Ahmetov eń aldymen, Katonqaraǵaı aýylynda ornalasqan S.Lastaev atyndaǵy orta mektepke taban tiredi. Aýdannyń turaqty damý qory esebinen «Aýyl mektebi» jobasy aıasynda bilim ordasynyń kabınetteri jóndeýden ótken. Jańa úlgidegi 9 pándik synyp ázirlenip, «Nazarbaev Zııatkerlik mektebi» bilim berý ortalyǵyna ádistemelik quraldar men mýzykalyq jabdyqtar satyp alynǵan.
Sondaı-aq ákim jalpy aýdany 640 sharshy metr bolatyn tórt ekipáterli turǵyn úıdiń qurylys barysyn tekserdi. Páter kiltteri kópbalaly otbasylar men ákimdik kezeginde turǵandarǵa beriledi. Danıal Ahmetov Qurylys, sáýlet jáne qala qurylysy basqarmasyna jumystyń sapaly oryndalýyn qatań baqylaýǵa alýdy tapsyrdy.
Óńir basshysy aýqymdy jóndeýdi talap etetin «Altaı komhozservıs» KMK-nyń jylytý qazandyǵyna bardy.
«Basqa aýdandar men qalalardaǵy qazandyqtardy jóndeý jáne salý tájirıbesin eskere otyryp, Qurylys basqarmasyna barlyq shyǵyndardy muqııat taldaýdy tapsyrdym. Eger eski qazandyqty qaıta qalpyna keltirý jańasyn salýdan qaraǵanda qymbatqa tússe, jospardy qaıta qarap, zamanaýı ári energııalyq jaǵynan tıimdi jańa jylytý qazandyǵyn salýǵa qarjy bólemiz, - dedi Danıal Ahmetov.
Budan bólek, polıtsııa bólimin aralaǵan ol ǵımarattyń irgetasy 1970 jyly qalanǵanyn jáne tolyq jóndeýdi qajet etetinin aıtty. Biraq bul úshin qajet degen 120 mln teńge negizsiz ári artyq qarjy. Sondyqtan ákim bıýdjetti qaıta qarap, ony 2,5 esege qysqartýdy tapsyrdy.
Odan keıin oblys ákimi dene shynyqtyrý-saýyqtyrý kesheniniń qurylys alańyn aralady. Jumysqa kóńili tolǵan óńir basshysy quzyrly basqarma basshylyǵyna aımaqta osyndaı tıptik keshenderdiń sanyn arttyrýdy usyndy.
«Oblystyń barlyq aýdandarynda salynyp jatqan dene shynyqtyrý-saýyqtyrý keshenderiniń árqaısysyna jeke jobalyq-smetalyq qujattama ázirleýdiń qajeti joq dep sanaımyn. Tıptik nysandardy salǵan durys bolady. Bul bıýdjet qarjysyn únemdeýge múmkindik beredi», - dedi Danıal Ahmetov.
Jumys saparynyń sońynda oblys ákimi bıyl ashylǵan «Qarataı» qonaq úıin de aralap shyqty. Munda aýyldyń isker azamattary kıiz úıler tigip, shaǵyn aǵash úıler salyp qoıǵan. Bul jerge kúnine orta eseppen 15-20 týrıst keledi. Nysandy iske qosýǵa qomaqty ınvestıtsııa qajet bolmady.
Aýyldyq jerdegi týrızm memlekettiń qoldaýyna laıyq, Birinshiden, bul – aýyldy jerde qosymsha jumys ornyn ashýǵa jaqsy múmkindik. Aýdan ákimdigine osyndaı kásippen aınalysqysy keletin azamattardy anyqtaýdy tapsyramyn. Biz olarǵa tıptik jobalardy usynyp, qoldaý kórsetýge daıynbyz», - dedi D.Ahmetov.