Dándi daqyldar alqabynyń 7,5 paıyzy nashar kúıde – mınıstr

ASTANA. QazAqparat – Úkimet otyrysynda baıandama jasaǵan Aýyl sharýashylyǵy mınıstri Erbol Qarashókeev egis alqaptarynyń jaı-kúıin aıtyp berdi, dep habarlaıdy QazAqparat tilshisi.

«Egin egý naýqany sapaly tuqymdardy paıdalana otyryp, ońtaıly ýaqytta júrgizildi. Fermerler tyńaıtqyshtardy ýaqytynda engizdi, aramshópter men aýrýlarǵa qarsy hımııalyq óńdeý ýaqtyly júrgizildi. Sonymen qatar, bıyl vegetatsııalyq kezeńde aýyl sharýashylyǵy taýaryn óndirýshiler qurǵaqshylyqqa jáne sýarmaly sýdyń bolmaýyna baılanysty birqatar problemalarǵa kez boldy. Bul daqyldardyń jaı-kúıine áser etti. Máselen, oblystar ákimdikteriniń jedel derekteri boıynsha búginde dándi daqyldar egisiniń 45,1%-y jaqsy, 46%-y qanaǵattanarlyq jáne 7,5%-y nashar jaı-kúıde», - dep baıandady mınıstr.

Erbol Qarashókeev atap ótkendeı, egistiń nashar bolýyna baılanysty 181 myń gektar jerdegi daqyldar joıylǵan.

«Bul rette, 181 myń gektar nemese astyq daqyldarynyń 1%-y joıylǵan. Bul negizinen Pavlodar oblysynda oryn aldy. Bul rette kórsetkish ortasha kópjyldyq kórsetkishten tómen ekenin atap ótemiz. Salystyrmaly túrde, qurǵaq dep sanalǵan 2021 jyly daqyldardyń 3,8%-y joıylǵan», - dep toqtaldy.