Damyǵan elderdiń damýshy memleketterge qatysty «domıno» saıasatyn doǵarý qajet - BUU

ASTANA. 23 mamyr. QazAqparat - Damýshy memleketterge qatysty neshe túrli qıturqy pıǵyldarǵa qaramastan, olardyń óz ekonomıkasyn kóterýge qajetti resýrstardyń jetetindigin túsiný kerek. Bul týraly VI Astana ekonomıkalyq forýmynyń saltanatty ashylý rásiminde sóz sóılegen BUU Bas hatshysynyń ekonomıkalyq jáne áleýmettik máseleler jónindegi orynbasary Ý Hýnbo málim etti.

Bas hatshynyń orynbasary atap kórsetkendeı, álemdik ekonomıkany qalpyna keltirý jumysyn júrgizý kezinde jańa jumys oryndaryn ashý máselesine erekshe basymdyq bergen jón. «Alaıda árbir memlekettiń osy saladaǵy qyzmeti onyń ulttyq erekshelikterine saı bolýy shart. Búginde álemdik ekonomıkany qalpyna keltirýdiń biryńǵaı tásilin ustanýdy qoıa turý qajet. Al naqty ekonomıkalyq saıasatqa keler bolsaq, árbir memlekettiń jumyspen qamtý máselesi, ulttyq taýardy kúsheıtý jáne onyń el ekonomıkasyna ákeler paıdasy - osynyń barlyǵy ortaq maqsattan da joǵary turýy tıis. Negizi, búginde damyǵan elderdiń damýshy memleketterge qatysty «domıno» saıasatyn doǵarý qajet. Sebebi qarjy salasyndaǵy neshe túrli qıturqy áreketterge qaramastan, damýshy memleketterde bar resýrstardyń jergilikti ekonomıkany kóterýge jetetindigin túsiný kerek», - dep atap kórsetti Ý Hýnbo.