Damyǵan elderde qylmystyq álem degen uǵym joq – Sadyr Japarov uıymdasqan qylmystyq toptar týraly

<p>4 qazanda Bishkekte júrgizilgen arnaıy operatsııa barysynda Qyrǵyzstandaǵy qylmys áleminiń serkesi atanǵan Qamshy Asanbek (Kólbaev) joıyldy. Bul oqıǵa elde úlken rezonans týdyryp, qoǵamda áli de qyzý talqylanýda. Qyrǵyzstanda uıymdasqan qylmystyq top pen onyń jetekshileri bolmaýy kerek degen pikir aıtyldy. Bul týraly el prezıdenti Sadyr Japarov óz pikirin bildirdi.</p>

- Memlekettik ulttyq qaýipsizdik komıtetiniń arnaıy operatsııasy kezinde uıymdasqan qylmystyq top jetekshisi Qamshy Kólbaevtyń ólimi áleýmettik jelilerde eń kóp talqylanǵan taqyryptardyń birine aınaldy. Ony synaǵandarmen qatar, qoldaıtyndar da boldy. «Óltirmeı-aq tutqynǵa alýǵa bolmas pa edi?» dep suraǵandar da tabyldy. Siz bul operatsııaǵa daıyndyqtan habardar boldyńyz ba ?

- Men de bul týraly sizder sııaqty ınternetten bilip, dereý bas prokýrorǵa áskerı prokýrorlarmen oqıǵa ornyna baryp, jaǵdaıdy baıandaýdy tapsyrdym. Kelgennen keıin ol maǵan telefon soǵyp, atys bolǵanyn, jaralanǵandar men qaıtys bolǵandar bar ekenin aıtty. Arnaıy operatsııanyń zańdylyǵyna baǵa berý úshin áskerı prokýratýra isti jedel qolǵa aldy. Tergeý áli jalǵasýda. Nátıjesin kúteıik.

- Jalpy qylmystyq toptar qoǵam ómirine, memlekettik organdardyń qyzmetine qalaı áser etedi? Uıymdasqan qylmystyq toptar men olardyń jetekshileri elimizde bolmaýy kerek degen pikir aıtyldy. Biraq qylmys bedeldileri keı máselelerdi memlekettik organdarǵa qaraǵanda tezirek sheshe alady deıdi. Bul týraly ne oılaısyz ?

- Damyǵan elderde qylmystyq álem degen uǵym joq, sol sebepti damyp jatyr. Qylmystyq orta, árıne, memlekettiń qyzmetine ǵana emes, azamattar men ınvestorlarǵa da keri áserin tıgizedi. Qylmyskerler zamany ótkenniń enshisinde qalýy kerek. Qazir 21 ǵasyr. Barlyǵy zań aıasynda bolýy kerek. Bireý qaraqshylardyń qolynan zardap shekse, bul týraly quqyq qorǵaý organdaryna habarlaý kerek. Biz tezirek damyǵan memlekettiń jolyna túsýge tıispiz kerek. Onsyz da damý jolynda kórshiles elderden de kóp jyldarǵa artta qaldyq.

Osyǵan deıin Qyrǵyzstanda Kamchy Kólbaev uıymdasqan qylmystyq tobynyń belsendi múshesi ustalǵanyn jazdyq.