Dámhanalarda kalıan usynylatyny jasyryn emes - Senat tóraǵasy

<p>ASTANA. KAZINFORM - Zańdy ázirleýden bólek, ony júzege asyrý jáne oryndalýyn baqylaý da asa mańyzdy mindet. Senat spıkeri Máýlen Áshimbaev energetıkalyq sýsyndarǵa tyıym salý jónindegi zańnamalyq sharalardyń tıimsiz bolyp qalýy múmkin ekenine nazar aýdardy.</p>

«Iá, biz tyıym salýdy maquldaımyz. Biraq, áriptester, biz osyndaı tyıymdardy kalıan men veıpterge de qatysty engizgen edik. Sol máseleler boıynsha qanshama talqylaýlar boldy. Alaıda, qazir kóptegen oryndarda, dámhanalar men meıramhanalarda kelýshiler kalıan tutynatyny jasyryn emes. Veıpterge de tyıym saldyq. Degenmen, olar da satylyp jatyr. Osy rette Úkimet zańdardyń oryndalýyn qanshalyqty baqylaıdy degen úlken suraq týyndaıdy. Memleket basshysy bergen tapsyrmalardy atústi emes, tolyq oryndaýymyz kerek. Eger biz, shyn máninde,ulttyń densaýlyǵy men salamatty ómir saltyn saqtaýdy oılasaq, zańdar qabyldap qana qoımaı, olardyń tolyq iske asyrylýyn da qamtamasyz eteıik. Zań oryndalmasa, quqyqtyq memlekettiń búkil qurylymy zardap shegip, jumysyn toqtatady. Energetıkalyq sýsyndarǵa tyıym salý týraly norma durys ekeni túsinikti. Ony dárigerler de aıtyp júr. Endi sol normalardyń júzege asyrylýyn baqylaý qajet», – dedi Senat tóraǵasy.

Máýlen Áshimbaevtyń aıtýynsha, quqyq buzǵandardy anyqtaý úshin alysqa barýdyń jáne erekshe kúsh salýdyń qajeti joq. Barlyq «dálel» ashyq jarııalanatyn áleýmettik jelilerdi baqylasa da jetkilikti.

«Máselen, kalıandar boıynsha aıtaıyq. Búgin Palata otyrysynda Úkimettiń de ókili otyr. Osy máseleni jergilikti atqarýshy organdarmen birge teksergen jón. Іshki ister mınıstrliginiń de basshylyǵy osynda. Keshki Astanaǵa shyǵyp qarańyz. Tipti eshqaıda shyǵýdyń da qajeti joq. Munyń bári áleýmettik jelilerde jazylyp, sýretterine deıin jarııalanyp jatyr. Osyǵan qarap, zańnyń oryndalýy týraly ne aıtýǵa bolady ? Eger oryndalmaıtyn bolsa, zańdardy ne úshin qabyldaımyz ? Bul Іshki ister mınıstrligine, Úkimetke, jergilikti atqarýshy organdarǵa qatysty suraq. Mundaı máseleniń basqa da zańdarǵa qatysy bar», – dedi Máýlen Áshimbaev.

Aıta keteıik, búgin Palata otyrysynda senatorlar «Qazaqstan Respýblıkasynyń keıbir zańnamalyq aktilerine oıyn bıznesi, lotereıa qyzmeti, densaýlyq saqtaý, memlekettik eńbek ınspektsııasy, memlekettik baqylaý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zańdy qarady.