Dalasy – dastan. Tileýi – ashyq aspan. Birligi jarasqan – Qazaqstan
Kóptegen ulttyń shattyq toly shańyraǵyna aınalǵan Qazaqstan jer jahanǵa beıbitshiliktiń ozyq úlgisin tanytyp otyr. Tiline, túrine, diline, dinine qaramastan syılastyqta ómir súrip jatqan qazaqstandyqtar tek merekede ǵana emes, ár kún saıyn tatýlyqtyń týyn jyqpaı, birlikti baǵalaıtyny baıqalady. Ol beker emes.
Keıingi jyldary álemde geosaıası ahýal kúrdelenip, qarýly qaqtyǵystar tyıylmaı tur. Aýmaly‑tókpeli kezeńdi bastan keshirý, jyldar boıyna jalǵasatyn dinaralyq, ultaralyq shıelenister zardaby orasan bolady. Saldaryn kórip júrmiz. Beıkúná sábıler, beıbit turǵyndar qaza taýyp jatyr. Osyndaıda qarııalardyń «elimiz aman, jurtymyz tynysh bolsyn» degen batasynyń máni tereńde jatqanyn ańǵarýǵa bolady.
Jalpy, birlik degen uǵymdy ulttar arasyndaǵy qatynasqa ǵana qoldanýǵa bolmas. Alystan mysal izdep kerek emes. Mine, elimizdiń birqatar aımaǵy sý tasqynynan zardap shekkende qazaqstandyqtar ózara uıymdasyp, gýmanıtarlyq kómek jınaı bastady. Tipti, ár aýyldan toptasqan er azamattar alys jolǵa shyǵyp, sý tasqynynyń aldyn alý sharalaryna atsalysty. Bul birlik emeı nemene?!
Elimizdiń kóptegen óńirinde tótenshe jaǵdaı rejımi engizilgennen beri eriktiler de aıaǵynan tik turdy. Volonterler turǵyndardy evakýatsııalaýǵa atsalysyp, qutqarylǵan adamdarǵa alǵashqy medıtsınalyq, psıhologııalyq kómek kórsetti. Gýmanıtarlyq kómekti jınap suryptap, tıisti jerge jóneltti. Aryq qazyp, bógetterdi nyǵaıtty. Qajet bolǵan jaǵdaıda qutqarýshylar men áskerı qurylym qyzmetkerlerine ystyq tamaq uıymdastyrdy. Osy ýaqytqa deıin volonterler shamamen 9903 tonna gýmanıtarlyq kómek jınap úlgergen eken. Bul birlik emeı nemene?!
Sý tasqynyna Qarýly kúshterdiń jeke quramy da tartylǵany belgili. Kúni-túni aýyr jumystardy atqaryp júrgen de solar. Kez kelgen tótenshe jaǵdaıda áskerılerdiń jumyldyrylýy zańdylyq bolsa da, beınejazbalardan, sýretterden jas sarbazdardyń sýǵa belsheden kirip, janqııarlyqpen kúresip júrgenin ańǵarýǵa bolady. Tótenshe jaǵdaılar mınıstrliginiń qyzmetkerleri de mindetin minsiz oryndap, halyqtyń alǵysyna bólenip jatyr. Jalpy, kez kelgen kúshtik qurylym mamandary jurtshylyqpen birge tynystap, qysyltaıań kezeńde qoldaý kórsetti. Ánsheıinde quqyq qorǵaý organdaryn jaqtyra bermeıtin keıbir adamdar el basyna kún týǵanda halyqpen birge bolǵan shendi azamattarǵa alǵysy sheksiz shyǵar?! Iá, myńdaǵan kúshtik qurylym ókili otbasynan jyraq ketip, sý tasqynynyń aldyn alýǵa atsalysyp júr. Bul birlik emeı nemene?!
Birligi joq eldiń tirligi ónbeıtini aıdan anyq. Tatýlyqty tý etken eldiń damýdyń dańǵyl jolyna túsip, kóshbasshyǵa aınalatynyn álemdegi oqıǵalar dáleldep berdi. Endeshe, qýatty Qazaqstannyń ár turǵyny beıbitshiliktiń qadirin túsinip, «yrys aldy – yntymaq» degen ustanymdy umytpaýǵa tıis.