Dalada jumys isteıtin eńbek adamdaryna kóbirek kóńil bólinse eken – Aqushtap Baqtygereeva
Aqynnyń aıtýynsha, Memleket basshysynyń málimdemesinde kóp másele aıtyldy. Tek sony jergilikti bılik oryndary oryndaı bilýi kerek.
«Ásirese, qazirgideı kezeńde dalada egin salyp, mal baǵyp otyrǵan sharýa qojalyqtaryna barynsha qoldaý kórsetilse deımin. Ózim biletin sharýa adamdaryna ótken jyly demeýqarjy berilgen joq. Ekonomıka turalaıdy dep álem shýlap, dabyl qaǵyp jatqan mezgilde bizdiń dalamyz nazardan tys qalmaýy kerek. Jumyssyzdyq beleń almas úshin qoldan kelgenniń bárin jasaý qajet», dedi Aqushtap Baqtygereeva.
Taǵy bir túıtkildi másele – mektep oqýshylaryn qashyqtan oqytý jaıy. Aýyldarda ınternettiń durys jolǵa qoıylmaǵany belgili. Sondaı jaǵdaıda balalardy qalaı oqytpaqshymyz? Bul da – oılanatyn másele.
«Barsha aǵaıynǵa aıtarym, qazir bárimiz úshin, urpaǵymyz syn saǵaty týyp tur. Úıden shyqpa dese, shyqpasqa kerek. Bul – eshqandaı dárige, ǵylymǵa ál bermeı jatqan indet. Endeshe, sodan aman qalýdy oılaý kerek. Bálkim, qaıyrymdylyq, bálkim, ózińdi óziń syılaý mádenıetiń, bálkim, medıtsınalyq saýattylyǵyń, tazalyqty saqtaı bilýiń kómekteser. Qydyrýdy qoıaıyq, orynsyz júrýdi doǵaraıyq. Óz úıimizdiń qadirin bileıik. Tańda turyp, «Balam, qaliń qalaı?» deıik, «Anam, qaliń qalaı?» deıik bir-birimizge. Úkimetimizdiń aıtqanyn isteıik. Tártipke kóneıik, taǵdyrǵa baǵynaıyq, uly kúshti moıyndaıyq. Aınalaıyn halqym, abaı bolaıyq!», dedi aqyn.
Aıta keteıik, keshe Prezıdent Qasym-Jomart Toqaev respýblıkalyq telearnalar efırinen málimdeme jasaǵan bolatyn.