Dala órti: Kúıik shalǵan órt sóndirýshilerdiń jaǵdaıy belgili boldy

SEMEI. QazAqparat – Abaı oblysynda kúıik jaraqatyn alǵan eki órt sóndirýshiniń biri jansaqtaý bóliminde jatyr, dep habarlaıdy QazAqparat tilshisi.

Abaı oblysy ákimdigi baspasóz qyzmetiniń málimetine súıensek, Jarma aýdany Bozjyra aýyldyq okrýginde dala órtin sóndirý kezinde denesin kúıik shalǵan eki órt sóndirýshi qazir aýrýhanada jatyr.

«№22 órt sóndirý bólimshesiniń komandıri Amangeldi Turlybekov shuǵyl túrde respýblıkalyq medıtsınalyq avıatsııamen Semeı qalasynyń jedel járdem aýrýhanasyna jetkizildi. Qazir jansaqtaý bóliminde jatqan azamattyń jaǵdaıy aýyr», - delingen aqparatta.

Al atalǵan bólimniń órt sóndirýshi-qutqarýshysy, azamattyq qorǵaýdyń qatardaǵy qyzmetkeri Nurlan Sálimjannyń qolyn termııalyq kúıik shalǵan.

«Ol Jarma aýdany Shar qalasyndaǵy aýrýhanada dárigerlerdiń baqylaýynda. Qazirgi ýaqytta oqıǵanyń mán-jaıy anyqtalyp, tolyq aqparat jınalyp jatyr», - delingen ákimdik habarlamasynda.

Eske salsaq, osyǵan deıin Abaı oblysynda 3 órt sóndirýshini kúıik shalyp, olardyń biri kóz jumǵanyn habarlaǵan edik. Qaza bolǵan 36 jastaǵy serjant Aıdos Toǵyzbaevtyń artynda 5 balasy qaldy. Ol ІІІ dárejeli «Aıbyn» memlekettik nagradasyna usynyldy.

Vıdeodan alynǵan kadr