Daǵystandaǵy teraktini kimder uıymdastyrǵany belgili boldy

<p>ASTANA. KAZINFORM — Daǵystandaǵy teraktini uıymdastyrýshylardyń áreketi «Krokýs Sıtı Hollda» áreket etýshilerge qaraǵanda «áldeqaıda tereń ári salmaqty boldy», dep málimdedi buqaralyq aqparat quraldarynyń ókilderine arnalǵan brıfıngide Daǵystan basshysy Sergeı Melıkov. Bul týraly <a href="https://kaz.inform.kz/" target="_blank" rel="noopener">Kazinform</a> agenttiginiń Reseıdegi menshikti tilshisi habarlady. </p>

RF Terrorızmge qarsy ulttyq komıteti aqparat ortalyǵynyń habarlaýynsha, terrorızmge qarsy júrgizilgen operatsııa barysynda Derbent qalasynda eki qylmysker, Mahachkalada úsheýi ustalǵan. 

Qarýly shabýylǵa baılanysty Reseı tergeý komıtetiniń Daǵystandaǵy tergeý basqarmasy RF QK-niń 205 baby (terrorıstik akt) jáne 222 baby (atys qarýyn zańsyz alý, saqtaý, alyp júrý), sondaı-aq 226 baby (atys qarýyn urlaý) boıynsha qylmystyq is qozǵady. 

Atys bolǵan jerde qaýipsizdik organdarynyń jarylysqa jaýapty mamandary jumys istep jatyr. Sondaı-aq jedel-izdestirý is-sharalary júrgizilip, qylmyskerlerdi qoldaýshylar da izdestirilýde. 

Foto: RF Terrorızmge qarsy ulttyq komıteti

«Jedel izdestirý jáne tergeý jumysy oqıǵanyń búkil fıgýranttary anyqtalǵansha júrgizile beredi. Sondaı-aq shetelden qoldaý kórsetip otyrǵandar da anyqtalady», -dedi Sergeı Melıkov daǵystandyqtarǵa qarata aıtqan beıneúndeýinde. 

Dúısenbi kúni Mahachkalada ótken baspasóz máslıhatynda ol eki qalada uıymdastyrylǵan teraktilerdiń ýaqyty men maqsat-mindetteri úılestirilgenin atap ótti.

Sondaı-aq ol terrorısterdiń áreketi bıylǵy naýryz aıynda «Krokýs Sıtı Hollda» jasalǵan áreketten «tereń ári salmaqty» bolǵanyn jetkizdi. 

«Qylmyskerler bir mezette tórt terrorıstik akt uıymdastyryp, sol arqyly quqyq qorǵaý jáne kúsh-qýat qurylymdarynyń jumysyn tyǵyryqqa tirep, jaýapkershilikten de, tutqyndalýdan da aman qutylyp ketemiz degen oıda bolǵan sııaqty», -dedi Daǵystan basshysy. 

Búgingi tańda Daǵystandaǵy sınagoga men shirkeýilerge shabýyldaǵan sodyrlardyń kim ekeni anyqtalǵan. 

Foto: RF Terrorızmge qarsy ulttyq komıteti

Birqatar reseılik telegram-arnanyń habarlaýynsha, Daǵystanda kózi joıylǵan eki sodyr Osman men Ádil Omarovtar — Serkagalınsk aýdanynyń basshysy Magomed Omarovtyń balalary. 

Baza Telegram-arnasynyń habarlaýynsha, sodyrlardyń biri — Abdýsamad Amadzıev. 

Mash Telegram-arnasy sodyrlardyń biri Abdýlmanap Nýrmagamedov mektebiniń tárbıelenýshisi, aralas jekpe-jek sheberi Gadjımýrad Kagırov bolýy múmkin ekenin habarlady. 

Serkagalınsk aýdanynyń basshysy M.Omarov jeksenbi kúni tutqyndalyp, onyń úıine tintý júrgizildi.

Ol otstavkaǵa ótinish berip, «Edınaıa Rossııa» bılik partııasy qatarynan shyǵaryldy.

Foto: RF Terrorızmge qarsy ulttyq komıteti

Aıta keteıik, 24 maýsym kúni Daǵystanda belgisiz bireýler pravoslav shirkeýi men sınagogaǵa shabýyl jasady.

Sonyń saldarynan polıtsııanyń 15 qyzmetkeri men 4 azamat qaza boldy. Onyń arasynda shirkeýi qyzmetkeri de bar.

Respýblıkada 24, 25 jáne 26 maýsym azat tutý kúni bolyp jarııalandy.

Qaıǵyly jaǵdaıǵa baılanysty Memleket basshysy Qasym-Jomart Toqaev Reseı Prezıdenti Vladımır Pýtınge kóńil aıtty.