Daǵystanda belgisiz bireýler pravoslav shirkeýi men sınagogaǵa shabýyl jasady
«Derbent pen Mahachkalada eki pravoslavıe shirkeýi, sınagoga men jol polıtsııasy beketine shabýyl jasaldy», — dep jazdy terrorızmge qarsy ulttyq komıtet.
«Derbenttegi dinı qyzmetker men Mahachkalada shirkeý kúzetshisi qaza tapty», — dep málimdedi Daǵystannyń Qoǵamdyq baqylaý komıssııasynyń tóraǵasy Shamıl Hadýlaev.
Mahachkalada belgisiz bireýler Ermoshkın kóshesindegi jol polıtsııasy beketine oq jaýdyrǵan.
«Aldyn ala málimet boıynsha, alty polıtsııa qyzmetkeri qaza taýyp, 12-si jaralandy», — dep jazdy Daǵystan ishki ister mınıstrliginen.
Mahachkalada qaqtyǵys jalǵasýda, polıtsııanyń patrýldik kóligi órtendi.
Derbenttiń ortalyq bóligi elektr jaryǵynsyz qaldy, qalada qaqtyǵystar bolyp jatyr
Kúdiktiler minip qashyp ketken kólik izdestirilýde. Belgileri: aq Volkswagen Polo, nómiri — 921.
Daǵystannyń Derbent qalasyndaǵy sınagogada belgisiz bireýlerdiń shabýylynan keıin órt shyqty, dep habarlady qala ákimdigi. Tótenshe jaǵdaılar mınıstrliginiń qyzmetkerleri órtti sóndirip, oqshaýlady.
Daǵystanda «Ustaý» jospary jarııalandy. Shabýyl jasaýshylardyń jeke basy anyqtalyp jatyr.
«Eki sodyr joıyldy, qaýipsizdik kúshteriniń jumysy jalǵasýda», — delingen Daǵystan ishki ister mınıstrliginiń málimdemesinde.
«Polıtsııa qyzmetkerlerine jasalǵan shabýyldan keıin jedel shtab quryldy», — dep habarlady aımaq basshysy Sergeı Melıkov.
Ol Derbent pen Mahachkaladaǵy shabýyldardy áleýmettik jaǵdaıdy turaqsyzdandyrý áreketi dep atap, azamattardy sabyrǵa shaqyrdy.
Tergeý komıteti terakt (Reseı Federatsııasy Qylmystyq kodeksiniń 205-baby) boıynsha is qozǵady. Derbenttegi oqıǵa ornyna Daǵystan boıynsha Tergeý komıtetiniń oblystyq departamentiniń basshylyǵy, tergeýshileri men krımınalısteri attandy.
Daǵystannyń barlyq aýmaǵynda terrorızmge qarsy operatsııa rejımi engizildi.
Daǵystan Respýblıkasy múftııatynyń Telegram-kanalyndaǵy jańartylǵan aqparatqa sáıkes, Mahachkala men Derbentte sodyrlardyń shabýyly saldarynan 9 adam qaza tapty, onyń jeteýi quqyq qorǵaý organdarynyń qyzmetkerleri, 25 adam jaraqat aldy.