Daǵdarysqa qarsy júrgizilgen batyl reformalar
Sheteldik sarapshy Memleket basshysy Nursultan Nazarbaevtyń «Bes ınstıtýtsonaldyq reformasyn» álemdik daǵdarys kezeńindegi eń batyl reforma dep atady. «Biz Astana klýbynyń alǵashqy otyrysynda Qazaqstan Respýblıkasynyń Premer-Mınıstri Kárim Másimovten Qazaqstandaǵy jańa baǵdarlamalyq reformalar týraly estidik. Bálkim qazir Qazaqstanda qandaı da bir reformalar iske asyrylyp jatqan bolar. Biraq meniń oıymsha, jańa baǵdarlamalyq reforma eń batyl qadam bolyp tabylady. Óıtkeni álemde energetıkalyq naryqtardyń quldyraýy oryn alyp, munaı baǵasy men aıyrbas baǵamynyń kúrt tómendeýi bolyp jatqan kezeńde mundaı óte kúrdeli, óte kóp reformalardy iske asyrýǵa táýekelge bel býý asqan batyldyq dep sanaımyn»,- dep málimdedi Andjela Stent Astana klýbynyń otyrysynan keıin jýrnalısterge bergen shaǵyn suhbatynda.
Onyń pikirinshe, álemdik deńgeıdegi jetekshi sarapshylar basqosýynyń Astanada ótýiniń erekshe mańyzy bar. «Qazaqstan bul forýmdy óte keremet uıymdastyryp, joǵary deńgeıde ótkizdi. Biz ekonomıka, saıasat, halyqaralyq qatynastar salasyndaǵy kez-kelgen máseleni talqylaǵanda Qazaqstannyń Ortalyq Azııa aımaǵyndaǵy kóshbasshy memleket ekenine kózimiz jetti. Sonymen qatar, osy forýmda Qazaqstannyń 2017 jyly BUU-nyń Qaýipsizdik Keńesiniń turaqty emes múshesi bolýǵa bergen ótinishiniń asa mańyzdylyǵyn atap kórsettik»,- dedi Djordjtaýn ýnıversıtetiniń zertteý ortalyǵynyń jetekshisi.
Reseıdegi Halyqaralyq ister jónindegi Keńestiń baǵdarlamalyq dırektory Ivan Tımofeev Astana klýbynda jarııa bolǵan Qazaqstan Respýblıkasynyń Premer-Mınıstri Kárim Másimovtiń elimizdiń syrtqy saıasatyna qatysty pikirin «úlgi bolarlyq pikir» dep atady. «Maǵan osy otyrysta aıtqan Qazaqstan Respýblıkasy Úkimetiniń basshysy Kárim Másimovtiń respýblıkanyń syrtqy saıasaty týraly tushymdy pikiri qatty unady. Ol Qazaqstannyń syrtqy saıasaty aınalasyndaǵy elderdiń damýy úshin barynsha jaǵymdy ahýal qalyptastyrýdan quralady dedi. Meniń oıymsha, bul óte konstrýktıvti kózqaras. Ol basqalarǵa úlgi bolarlyq kózqaras dep sanaımyn» dedi I. Tımofeev Astana klýbynyń alǵashqy otyrysynan keıingi BAQ ókilderine bergen shaǵyn suhbatynda.
Qytaı Halyq Respýblıkasynyń Memlekettik Keńesiniń zertteý ortalyǵy janyndaǵy Eýropa jáne Azııa elderiniń áleýmettik damý ınstıtýtynyń dırektory Lı Fenlın Ortalyq Azııa aımaǵyndaǵy memleketterdiń (olardyń basynda Qazaqstan tur) álemdik daǵdarysqa qaramastan, úzdik ekonomıkalyq ósimge qol jetkizip, saıası turaqtylyqty berik saqtaýdan basqa elderge úlgi bolyp otyrǵanyn atap aıtty.