Daǵdarys azamattardyń bılikke senbeıtindigin kórsetti - Memleket basshysy

NUR-SULTAN. QazAqparat - Qazaqstan Prezıdenti Qasym-Jomart Toqaev Úkimettiń keńeıtilgen otyrysynda memlekettik basqarýdy qaıta qurý qajettigin málim etti. QazAqparat bul týraly Aqorda baspasóz qyzmetiniń Twitter-degi paraqshasyna silteme jasap habarlaıdy.

«Daǵdarys bizdiń qoǵamymyzdaǵy áleýmettik úılespeýshilikti, azamattardyń jergilikti jáne ortalyq bılikke kúmáni men senbeıtindigin kórsetip berdi. Memlekettik basqarýdy qaıta qurý qajet. Ol jergilikti ózin-ózi basqarýdy aıtarlyqtaı kúsheıtýdi qarastyratyn saıası reformanyń bóligine aınalady», - dedi Memleket basshysy.

Aıta keteıik, vıdeobaılanys arqyly ótip jatqan jıynda Úkimet 2020 jyldyń alǵashqy jarty jyldyǵyndaǵy elimizdiń áleýmettik-ekonomıkalyq damý qorytyndysy týraly esep berdi. Sondaı-aq koronavırýsqa qarsy kúreske qatysty qabyldanǵan sharalar, Memleket basshysynyń Úkimettiń aldaǵy ýaqytta atqaratyn jumysynyń negizgi baǵyttary boıynsha bergen tapsyrmalary men mindetteri qarastyryldy.

Elimizdiń áleýmettik-ekonomıkalyq damýynyń qorytyndylary men jyl sońyna deıin oryndaıtyn mindetter jóninde Premer-Mınıstr Asqar Mamın, aqsha-nesıe saıasatyna qatysty sharalar týraly Ulttyq banktiń tóraǵasy Erbolat Dosaev, elimizdegi epıdemıologııalyq ahýaldy jaqsartý jónindegi sharalar týraly Densaýlyq saqtaý mınıstri Alekseı Tsoı baıandama jasady.