Daǵdarys ortalyqtarynyń róli artyp keledi – Zýlfııa Baısaqova

<p>ASTANA. KAZINFORM &ndash; Prezıdent Qasym-Jomart Toqaev búgin otbasylyq-turmystyq zorlyq-zombylyq týraly Zańǵa qol qoıdy. Onyń basym baǵyttary týraly daǵdarys ortalyqtary odaǵynyń tóraǵasy Zýlfııa Baısaqova aıtyp berdi.</p>

Onyń aıtýynsha, zańdaǵy túzetýler áıelder men balalardyń quqyqtaryn turmystyq zorlyq-zombylyqtan qorǵaýǵa baǵyttalǵan.

– Atalǵan túzetýler birqatar baptyń ákimshilik kodeksten Qylmystyq kodekske kóshirilýine, sol arqyly otbasylyq-turmystyq qatynas baǵytynda jasalǵan qylmys úshin jazany qatańdatýǵa áser etkenin atap ótkim keledi. Atap aıtqanda, endi óz jaqyndaryna qatysty zorlyq-zombylyq, qatygezdik jáne uryp-soǵý áreketteri qylmys retinde qarastyrylady jáne keltirilgen dene jaraqattarynyń aýyrlyǵyna baılanysty 15 jáne odan joǵary jyldar boıy bas bostandyǵynan aıyrý jazasy qoldanady, - dedi Zýlfııa Baısaqova.

Dese de, jazany qatańdatýmen qatar, agressorlarǵa psıhologııalyq kómek kórsetilmek.

– Endi densaýlyq saqtaý júıesinde túzetý baǵdarlamalary túrinde psıhologııalyq qoldaý ala alatyn agressorlarǵa kómek kórsetý usynylatyn bolady. Búginde agressorlarmen jumys isteý standarttary men modýlderin ázirleý mindeti tur, - dep atap ótti odaq tóraǵasy.

Onyń aıtýynsha, jańa túzetýlerge sáıkes, ashýyn aqylmen jeńbegen agressordyń baspanasy bar-joqtyǵy nazarǵa alynbaı, úıden qýylady.

Spıker zańnamadaǵy ózgerister otbasylyq zorlyq-zombylyq qurbandary men olardyń balalaryna qoldaý kórsetetin daǵdarys ortalyqtarynyń rólin kúsheıtetinin atap ótti. Sondaı-aq, óńirlerde otbasy ınstıtýtyn damytý maqsatynda otbasyn qoldaý ortalyqtary qurylatyn bolady.

Qorytyndylaı kele, Zýlfııa Baısaqova quqyq qoldaný praktıkasyna engizilgen ózgeristerdiń tıimdiligin birneshe aıdan keıin baǵalaýǵa bolatynyn atap ótti.