D. Nazarbaeva turǵyn úı-kommýnaldyq sharýashylyq máseleleri jónindegi jumys tobyn qurýdy usyndy

ASTANA. QazAqparat - Búgin Májiliste «Nur Otan» parlamenttik fraktsııasy janyndaǵy Óńirlik saıasat jáne máslıhattarmen jumys jónindegi keńesiniń keńeıtilgen otyrysynda palata vıtse-spıkeri Darıǵa Nazarbaeva turǵyn úı-kommýnaldyq sharýashylyq máseleleri jónindegi jumys tobyn qurýdy usyndy. Eske salaıyq, jıynda elimizdegi turǵyn úı-kommýnaldyq sharýashylyǵyn jańǵyrtý barysy talqylanǵan bolatyn.

Vıtse-spıkerdiń aıtýynsha, atalǵan jumys tobynyń quramyna Ulttyq ekonomıka mınıstrliginiń basshylary, múddeli depýtattar men ákimdik ókilderi qatysýy tıis.

«Turǵyn úı-kommýnaldyq sharýashylyǵy salasyndaǵy qordalanyp qalǵan máselelerdi sheshý joldaryn búginnen oılastyrǵan lázim. Qajetti is-sharalardy qysqa merzimde, jyl sońyna deıin qolǵa alý kerek. Óıtkeni bizge kelesi jyldy qandaı jumystan bastaıtynymyzdy aıqyndaý mańyzdy. Men ózim de bul jumysqa atsalysýǵa ázirmin. Al múddeli taraptardyń qatysýymen qurylǵan jumys tobynyń sheshimi turǵyn úı-kommýnaldyq sharýashylyq salasyn memlekettik retteý týraly zań jobasyn ázirleýge negiz bolady», - dedi D.Nazarbaeva.