CyberPol jobasy: 234 ınternet-alaıaqtyq áshkerelendi
«Kıberqylmyskerler men ınternet-alaıaqtar jańa shemalardy ázirleýdi jalǵastyrýda jáne qarapaıym turǵyndardy aldaýdyń ártúrli joldaryn tabýda. Osyǵan baılanysty ІІM qylmystyń atalǵan túrine qarsy turýǵa erekshe nazar aýdarady. Polıtsııa tsıfrlyq tehnologııalar salasyndaǵy qylmystarǵa qarsy kúreste, memlekettik organdarmen ózara baılanys jasaǵanda jáne halyq arasynda quqyqtyq saýattylyqty arttyrýda óziniń tıimdiligin kórsetetin «CyberPol» pılottyq jobasyn iske qosty», - dedi Shuǵyla Turlybek vedomstvonyń baspasóz qyzmeti alańynda ótken brıfıngte.
Onyń atap ótýinshe, joba ótken jyldyń jeltoqsan aıynan bastap elordanyń «Esil» aýdany PB janyndaǵy polıtsııa bóliminiń aýmaǵynda iske asyrylyp jatyr.
«Qysqa merzim ishinde quramynda bes tergeýshi, bes jedel ýákil jáne IT-krımınalıst bar «CyberPol» ekpindi-nysanaly toby 234 ınternet-alaıaqtyqty ásherelep, sotqa 184 qylmystyq isti joldady. Munda jumys «bir tereze» qaǵıdaty boıynsha jolǵa qoıylǵan jáne jasalǵan qylmys boıynsha shuǵyl tergeý áreketterin bir ýaqytta, bir jerde tergeýshi, krımınalıst jáne jedel qyzmetker júrgizedi. Buryn azamattar oǵan kóp ýaqyt joǵaltatyn edi. Endi ýaqyt joǵaltpaıdy. «CyberPol-da» ótinishti qabyldaýdyń jeńildetilgen mehanızmi bar. Jábirlenýshi kelgennen keıin birden ótinish qabyldanady. Sol tergeýshi isti sońyna deıin súıemeldeıdi. Adam ýaqytty joǵaltpaıdy jáne árqashan tergeýshimen baılanysta bolady», - dedi ol.