Tsoı: Jaǵdaı qıyndaı tússe elimizge 4 myńnan astam tynys alý apparaty kerek

NUR-SULTAN. QazAqparat – Densaýlyq saqtaý mınıstri Alekseı Tsoıdyń aıtýynsha, Qazaqstan ókpeni jasandy jeldetýdiń 4 myńnan astam apparatyn satyp alǵan jaǵdaıda eń qıyn stsenarııdiń ózine daıyn bolady, dep habarlaıdy QazAqparat tilshisi.

«Qazirgi tańda Qazaqstandaǵy ınfektsııalyq statsıonarlardaǵy 1553 ınfektsııalyq jansaqtaý tósek ornynda 966 dana statsıonarlyq ókpeni jasandy jeldetý apparaty bar. Sonymen birge Densaýlyq saqtaý mınıstrliginiń Ulttyq qoǵamdyq densaýlyq saqtaý ortalyǵynyń boljamyna sáıkes jalpy elge aldaǵy ýaqytta 6 365 jansaqtaý tósek ornyna 4 093 ókpeni jasandy jeldetý apparatyn satyp alý kerek bolady», - dedi Alekseı Tsoı Úkimettiń otyrysynda.

Mınıstrdiń aıtýynsha, osyndaı kólemdegi apparatty satyp alǵan jaǵdaıda eldegi aýrýhanalar qıyn stsenarııdiń ózine daıyn bolady.

«Bul apparattardy satyp alý shyǵynyn Dúnıejúzilik banktiń qaryzyn qaıta bólý jolymen 5,5 mlrd teńge, jergilikti bıýdjetterdiń 4,9 mlrd teńgelik resýrsymen, Úkimet rezerviniń qarajaty arqyly (otandy óndiristegi apparattardy satyp alý arqyly) jabý usynylady», - dedi ol.

Mınıstrdiń aıtýynsha, Indýstrııa jáne ınfraqurylymdyq damý mınıstrliginiń málimetine sáıkes osy jyldyń tamyzynda ókpeni jasandy jeldetý apparattarynyń otandyq óndirisi jolǵa qoıylyp, olardyń 595 dana alǵashqy partııasy densaýlyq saqtaý uıymdaryna jetkiziledi.