«COVID-19-syz saıahat» qosymshasy elder arasyndaǵy baılanysty nyǵaıtady - Mıhaıl Mıshýstın

ALMATY. QazAqparat - Reseı Federatsııasy Úkimetiniń tóraǵasy Mıhaıl Mıshýstın «Digital Almaty 2021- Jahandyq ekonomıkanyń tsıfrlyq bolashaǵy» atty halyqaralyq forýmda qazirdiń ózinde keńinen taralǵan «COVID-19-syz saıahat» mobıldi qosymshasy týraly málim etti, dep habarlaıdy QazAqparat tilshisi.

Spıkerdiń aıtýynsha, «COVID-19-syz saıahat» qosymshasy aldaǵy ýaqytta EAEO elderi arasyndaǵy týrıstik shekarany keńeıtedi.

«Reseı Federatsııasy qosymshany 1 aqpannan bastap qoldanyp jatyr. Bul qosymshany barlyq memleket qoldanady dep senemin. Ol elder arasyndaǵy baılanysty nyǵaıtady. Qazir Reseı, Armenııa jáne Belarýs sátti paıdalanyp jatyr», - dedi Mıhaıl Mıshýstın.

Saıahatqa shyǵatyn adam bul qosymshany telefonyna júktep alyp, tirkeledi. Ushaqpen ushýǵa 72 saǵat qalǵanda sonda belgilengen zerthananyń birinen testten ótedi. Eger test teris nátıje kórsetse ol qosymshada kórsetiledi jáne QR-kodpen rastalyp, áýejaıǵa joldama beredi. Osylaısha azamat erkin saıahattaý múmkindigine ıe bolady.

Mıhaıl Mıshýstın bul jańa qyzmetti paıdalaný Qazaqstan úshin tsıfrlandyrý salasyndaǵy taǵy bir tásil bolatynyn atap ótti.

«Baǵdarlamanyń artyqshylyǵy - test qorytyndysy teris nátıje kórsetken jaǵdaıda azamattar áýe kóligimen Reseı Federatsııasyna bara alady. Jaqyn arada Qazaqstan da osy qosymshany paıdalanady dep senemin», - dedi Reseı Federatsııasy Úkimetiniń tóraǵasy Mıhaıl Mıshýstın.