COVID-19 shekteýi alynǵannan keıin Qytaıǵa kelýshiler sany 50% artty

BEIJІŃ. QazAqparat – 2023 jyldyń 8 qańtarynda elge kiretin jolaýshylar úshin jańartylǵan hattama kúshine engennen keıin materıktik Qytaıǵa kelýshilerdiń ortasha táýliktik sany 54,7%-ǵa ósip, 250 myń adamdy qurady. Bul týraly brıfıng barysynda QHR kóshi-qon isteri jónindegi memlekettik basqarmasy shekaralyq baqylaý jáne basqarma bóliminiń bastyǵy Lıý Haıtao málimdedi, dep habarlaıdy QazAqparat menshikti tilshisi.

Onyń aıtýynsha, 2023 jyldyń 8-12 qańtarynda QHR kóshi-qon qyzmeti kún saıyn elge kiretin jáne shyǵatyn adamdardyń 490 myń qujatyn rásimdep jatyr.

Bul Qytaıdaǵy COVID-19 shekteýi týraly málimdemege deıingi kórsetkishten 48,9%-ǵa kóp.

«Qytaıǵa kelýshilerdiń ortasha táýliktik sany 54,7% ósimmen 250 myń adamdy, al elden ketip jatqandardyń ortasha táýliktik sany 43,3% ósimmen 240 myń adamdy quraıdy», - dep atap ótti ol.

Áýe jolaýshylarynyń eń úlken aǵyny «Pýdýn» halyqaralyq áýejaıynda (Shanhaı q., Shyǵys Qytaı), kúnine 11 myńǵa jýyq jolaýshy baıqaldy.

Al qurlyqtaǵy adam aǵyny kóp shekara ótkeli - «Fýtıan» (Shenchjen qalasy, Gýandýn provıntsııasy, Ońtústik Qytaı). Ol Gonkongtyń «qaqpasy» sanalady.

Vedomstvo málimetinshe, 2023 jyldyń 8 qańtarynan bastap materıktik Qytaıdyń 1,35 mıllıonnan astam turǵyny kóshi-qon saıasaty túzetilgenge deıin 129,4% ósimmen kirý/shyǵý qujattaryn alýǵa ótinim bergen.

QHR SІM Konsýldyq qyzmetiniń basshysy Ý Sı 2023 jylǵy 8 qańtardan bastap transshekaralyq saparlar boıynsha jańa sharalar kúshine engenin, shekaralyq shekteýler álsiregenin, halyqaralyq reıster sanyna qoıylǵan lımıt alynyp tastalǵanyn jáne Qytaıǵa kelgennen keıin ortalyqtandyrylǵan karantın joıylǵanyn taǵy da eske saldy.

2022 jyldyń jeltoqsan aıynyń sońynda QHR bıligi Qytaıǵa kelýshiler úshin erejeler jeńildetýdi, sondaı-aq COVID-19-ǵa qarsy kúres aıasynda engizilgen negizgi shekteýlerdi alyp tastaýdy jarııalady.

Foto: AP