COVID-19: Shalǵaı aýdan turǵyndaryna kómekke áskerı medıtsına qyzmetkerleri jiberilýi múmkin
Qazirgi ýaqytta Qazaqstannyń Qarýly Kúshterinde COVID-19-ben kúresý boıynsha is-sharalardy iske asyrý jáne indettiń jeke quram arasynda taralmaýyn boldyrmaý jalǵasýda.
Áskerı bólimder men mekemeler qajetti qorǵanys quraldarymen jáne medıtsınalyq múlikpen qamtamasyz etilip, epıdemııaǵa qarsy jáne sanıtarlyq-profılaktıkalyq is-sharalar ótkizilýde. Mamandar indettiń belgileri jáne naýqastarmen baılanys anyqtalǵan kezde ýaqtyly áreket etý úshin jeke quramnyń densaýlyq jaǵdaıyna únemi monıtorıng júrgizedi.
Búgin epıdemıologııalyq jaǵdaı jónindegi keńeste Qazaqstan Prezıdenti – Qarýly Kúshterdiń Joǵarǵy Bas qolbasshysy Qasym-Jomart Kemeluly Toqaev atap ótkendeı, ózińizdi jáne jaqyndaryńyzdy osy qaýipten qorǵaýdyń jalǵyz joly – ekpe alý. Álemdik medıtsına áli basqa ádisterdi usynǵan joq jáne jaqyn bolashaqta usynýy ekitalaı.
Qarýly Kúshterde jeke quramnyń ekpe alýy jalǵasýda. Ekpe alǵandardyń sany 100% jetti: onyń 99% birinshi komponetti qabyldaǵandar bolsa, ekinshi komponentti 92%-ǵa jýyq adam aldy.
- Taldaý kórsetkendeı ekpe alǵan áskerı qyzmetshilerdiń aýrýy jeńil túrde ótedi. Olardyń barlyǵy ambýlatorlyq em qabyldaýda, - dep túsindirdi QR QK Bas áskerı-medıtsınalyq basqarmasy sanıtarlyq-epıdemıologııalyq qadaǵalaý basqarmasynyń bastyǵy polkovnık Álbek Manabaev.
Sonymen birge áskerı dárigerler azamattyq uıymdarda qyzmet atqaratyn áriptesterine kómekke kelýge ázir. Aǵymdaǵy jyldyń sáýir aıynan bastap Almaty men Nur-Sultanda áskerı gospıtalder bólindi. Elordadaǵy Bas áskerı klınıkalyq gospıtali shilde aıynan bastap koronavırýspen syrqattanǵandardy emdeýdi bastady.
– Almaty, Taldyqorǵan jáne Úsharaldaǵy úsh áskerı-emdeý mekeme azamattardy qabyldaýǵa ázir. Aýrýdyń aýyr aǵymy bar naýqastar kelip túsken jaǵdaıǵa jansaqtaý bólimsheler daıyn. Olar ókpeni jasandy jeldetý apparattarymen, pýlsoksımetrlermen, ottegi kontsentratorlarymen jáne basqa da jabdyqtarmen jabdyqtalǵan, – dep habarlady QR QK Bas áskerı-medıtsınalyq basqarmasy sanıtarlyq-epıdemıologııalyq qadaǵalaý basqarmasynyń bastyǵy polkovnık Álbek Manabaev.
Sanıtarlyq-epıdemıologııalyq ortalyqtyń eki fılıaly – «Astana» men «Batysta» mamandardyń sany artyp, olardyń quramyna epıdemıologtar, vırýsologtar, bakterıologtar men zerthanashylar engizildi.
Aıagóz, Taldyqorǵan, Saryózek jáne Semeıdiń áskerı gospıtaldarynda qosymsha tórt ınfektsııalyq ızolıator jumys isteıdi. Nur-Sultan men Almatyda eki statsıonarlyq PTR-zerthana, sondaı-aq Aqtaý men Semeıde PTR-testileýdi ótkizý múmkindigi bar mobıldi zerthanalyq keshender jumys isteıdi.
Alshaqta ornalasqan aýdandardyń turǵyndaryna kómek retinde dárigerlik-meıirgerlik brıgadalar men Qarýly Kúshterdiń sanıtarlyq-epıdemıologııalyq qyzmetiniń mamandary qysqa merzimde jiberilýi múmkin.