COVID-19 pandemııasymen kúreske tartylǵan medıtsına qyzmetkerleri qosymsha aqy alady
Bul týraly QazAqparat QR Densaýlyq saqtaý mınıstrliginiń baspasóz qyzmetine silteme jasap habarlaıdy.
Sonymen, qosymsha tólemder joǵary táýekelmen belgilenedi. Ol reanımatsııa bólimshelerin jáne basqa da statsıonarlardy qosa alǵanda, ınfektsııalyq statsıonarlardyń dárigerlerine, orta jáne kishi medıtsınalyq personalyna tıesili.
Ortasha táýekel. Bul zerthana qyzmetkerlerine, sanepıdqyzmet mamandaryna, zerthana mamandaryna jáne zerthanashylarǵa qoldanylady.
Qosymsha tólemder tómen táýekelde de belgilenedi. Bul norma provızorlyq statsıonarlardyń dárigerlerine, orta jáne kishi medıtsınalyq personalyna; ortalyq atqarýshy organdardyń áskerı-medıtsınalyq bólimsheleriniń dárigerlerine, orta jáne kishi medıtsınalyq personalyna; sondaı-aq jedel medıtsınalyq kómektiń dárigerlerine, feldsherleri men júrgizýshilerine, shuǵyl statsıonarlardyń qabyldaý bólimsheleriniń qyzmetkerlerine qatysty.
KVI úshin jańa qosymsha aqy belgileý úshin respýblıkalyq bıýdjet komıssııasynyń sheshimimen 14 mlrd teńge somasynda qosymsha qarajat bólindi, olar densaýlyq saqtaý sýbektilerine jetkizildi.
Bul rette dárigerlerge, feldsherlerge jáne jedel medıtsınalyq járdem júrgizýshilerine osy qosymsha aqyny tóleý COVID-19 koronavırýs ınfektsııasynyń dıagnozy rastalǵan patsıentke (patsıentterge) bir jáne odan da kóp shaqyrý bolǵan kezde naqty jumys istegen aýysymy úshin júrgiziledi.
Aıta ketý kerek, COVID-19 koronavırýs ınfektsııasyna qarsy kúres sheńberindegi epıdemııaǵa qarsy is-sharalardaǵy jumysy úshin aldyńǵy ústemeaqylar 2021 jylǵy 1 qazanǵa deıin tólengen ýaqytsha tólemder boldy, al jańa tásilderde jańa ústemeaqylar qyzmetker jalaqysynyń negizgi bóligine engizildi jáne turaqty sıpattaǵy tólemder bolyp tabylady.
QR Densaýlyq saqtaý mınıstrligi pandemııa kezeńinde ǵana 1 171 birlik avtokólikti jańartty. Qarjy lızıngi sharttarynda satyp alynǵan sanıtarııalyq kólik boıynsha lızıngtik tólemderdi óteýge 2020-2021 jyldary óńirlerdiń jedel medıtsınalyq kómek qyzmetteri úshin 15,6 mlrd.teńge bólindi. 2023-2024 jyldarǵa 20,2 mlrd teńge josparlanǵan: 2023 jyly - 10,5 mlrd teńge, 2024 jyly – 9,7 mlrd teńge.