COVID-19 pandemııasy kóktemge qaraı aıaqtalady – germanııalyq sarapshy boljamy

ASTANA. QazAqparat – Germanııada koronavırýstyń kezekti qaýipti nusqasynyń taralýy ekitalaı. El úkimetiniń koronavırýsqa qarsy kúres jónindegi sarapshylyq keńesi múshesi, ıntensıvti terapııa dárigeri Krıstıan Karagıannıdıstiń aıtýynsha, COVID-19 vırýsynan qorǵanys óte jaqsy jumys istep tur. Bul týraly QazAqparat DW aqparat agenttigine silteme jasap habarlaıdy.

Dáriger COVID-19 pandemııasy 2023 jyldyń kóktemine qaraı aıaqtalady dep boljap otyr. Onyń aıtýynsha, SARS-CoV-2 vırýsynyń taǵy bir nemese birneshe «kishigirim tolqyndary» taralýy múmkin.

«Biraq, biz halyqtyń ımmýnıteti kúshti ekenin túsinemiz jáne bizdegi ıntensıvti terapııa bólimshelerinde kovıdpen aýyratyndar aıtarlyqtaı az. Pandemııanyń birtindep aıaqtalyp kele jatqanyna senemin», - dep keltirdi onyń sózderin Redaktionsnetzwerk Deutschland basylymdar toby.

Maman Germanııada koronavırýstyń taǵy bir qaýipti nusqasynyń taralýy ekitalaı dep sanaıdy.

«COVID-19 vırýsynan qorǵanys óte jaqsy jumys istep jatqan sııaqty, - deıdi sarapshy T-lımfotsıtter men antıdenelerge negizdelgen ımmýnıtet týraly aıta otyryp. - Aýyr syrqattanatyndar azaıyp keledi. Jaǵdaı qaıtalanbaıtyn bolar degen oıdamyn».

Aıta ketsek, Robert Koh atyndaǵy ınstıtýt taratqan málimetke sáıkes, 25 jeltoqsandaǵy jaǵdaı boıynsha Germanııada SARS-CoV-2 vırýsy 37,21 mln adamnan rastalǵan. Sonyń ishinde, 36,42 mln naýqas jazylyp shyqty, al 160 768 adam qaıtys boldy. 24 jeltoqsanǵa deıin Germanııada COVID-19 vırýsyna qarsy 190,4 mln vaktsına egildi. El turǵyndarynyń 76,3 paıyzy tolyq ekpe alsa, 62,6 paıyzyna ekpeniń kúsheıtkish dozasy egilgen.

Foto: www.dw.com