COVID -19: Qostanaı oblysynyń Reseımen shekarasy tekserildi

QOSTANAI. QazAqparat – Qostanaı oblysy polıtsııa departamentiniń bastyǵy Beket Aımaǵambetov «Qaıraq» shekara bólimine qarasty sanıtarlyq bekettiń jumysyn tekserdi, dep habarlaıdy QazAqparat oblystyq polıtsııa departamenti baspasóz qyzmetine silteme jasap.

Qostanaı oblysynda koronavırýstyq ınfektsııanyń aldyn alý jónindegi jedel shtab bastyǵynyń orynbasary B.Aımaǵambetovtiń sózine qaraǵanda, Qostanaı oblysy vırýstyń taralýy boıynsha qyzyl aımaqqa endi. Sondyqtan sanıtarlyq talaptardy qatań saqtaý mańyzdy. «Qaıraq» beketi arqyly elimizge taıaý shetelderden júkter jetkiziledi.

Munda kúnine 300-den astam júk kóliginiń júrgizýshileri PTR synaqtarynan ótedi. Mundaı jumys óziniń tıimdiligin dáleldedi: bir kúnde shekarada aýrýdyń 2-3 jaǵdaıy anyqtalady jáne juqtyrǵandardy oqshaýlaý boıynsha sharalar qabyldanady.

Beket Aımaǵambetov shekara mańyndaǵy dámhanalar men kempıngterde monıtorıngtik toptardyń jumysyn kúsheıtý qajettigin de atap ótti.

«Jol boıyndaǵy dámhanalarda barlyq karantındik sharalardyń saqtalýyn tekserý mańyzdy, óıtkeni vırýs taralýy múmkin. PTR test tapsyrsa da, dámhanaǵa soǵyp, aýrý juqtyratyndar bolady. Infektsııa juqtyrǵandar mindetti túrde karantınge jiberilýi kerek. Qyrǵyzstannyń, Reseıdiń jáne basqa elderdiń júrgizýshileri shekaraǵa synaq nátıjesimen kelýi tıis», - dedi Beket Aımaǵambetov.

Qostanaıdyń bas polıtseıi sanıtarlyq bekettiń jabdyqtalýy, mamandardyń qorǵanys quraldarymen qamtamasyz etilýi máselesine erekshe nazar aýdardy.

Qarabalyq aýdanynyń ákimi Nurjan Ótegenov habarlaǵandaı, aýmaqta 13 aýyldyq okrýg ornalasqan, olardyń birazy Chelıabi oblysynyń úsh aýdanymen shektesedi.

«Qazirgi ýaqytta Smırnov aýylynda birneshe otbasy aýyryp qaldy. Qazir jaǵdaıdy turaqtandyrý úshin sharalar qabyldanýda. 10 qarashadaǵy jaǵdaı boıynsha aýdanda 12 naýqas tirkeldi», - dedi N. Ótegenov.